【人物講嘢】逆著風

幾個年輕人,因為電影課程而相識,一日忽發奇想,要一齊拍一套長片,咁係咪有啲天方夜譚?但夢想其實就在不遠處,經過一年多嘅拍攝,講述馬拉松嘅獨立電影《逆著風》就快喺本地戲院上映啦!廣野今次搵嚟電影導演花天亮、監製兼演員羅導謙、演員麥振濤同埋副導演梁戴絲,講述佢哋點樣「無懼逆境,乘風而上」完成呢部電影。

記者:阿賢 攝影:Isaac

花:花天亮 羅:羅導謙 梁:梁戴絲 麥:麥振濤

導演:黃天亮
導演:花天亮
主演:羅導謙
主演:羅導謙
副導演:梁戴絲
副導演:梁戴絲
主演:麥振濤
主演:麥振濤

記:可否簡介《逆著風》嘅內容、或當中引人入勝嘅情節?

花:呢部電影係講馬拉松長跑,故事講述一個肥仔(張志澄,麥振濤飾)重遇佢嘅學長(羅國暉,羅導謙飾),呢位學長當年喺學校意氣風發,而家就相當頹廢。兩人隨後結伴,互相勉勵扶持,最後一齊完成馬拉松賽事。主要想帶出人到中年,到底仲有無可能重拾理想呢?

羅:至於引人入勝嘅情節方面,肥仔張志澄明顯唔係經常運動嘅人,但佢就要喺戲中接受各種苦練,慢慢又睇到佢嘅堅持,成個過程好有推動力,而且套戲都有唔少笑位,咁佢最終可唔可以達成目標呢?大家就要入場睇啦。

記:可否講下《逆著風》想帶俾觀眾嘅訊息或主旨?

花:當初點解會拍呢個題材呢?因為其他嘅運動競技性比較高,例如打拳、踢足球都好,最尾都一定會有輸贏,如果主角贏唔到,似乎又唔夠激動人心,往往令平凡人覺得難以企及,但跑馬拉松唔同,只要你肯踏出第一步,堅持落去,唔怕艱苦,就可以完成目標。唔係話要夠快或者攞冠軍,而係要戰勝自己,只要完成到個賽事,就係贏家,呢個就係電影想帶出嘅訊息。

羅:喺開始電影拍攝嘅果段時期,港澳發生咗唔少年輕人輕生嘅事件,我哋希望藉電影去話畀年輕人聽,做任何事只要肯堅持,任何事都有可能成功,唔好因為小小波折就搞到要生要死,生命得來不易。

台東海岸線
台東海岸線

記:你地喺拍攝呢齣電影嘅期間遇上過咩困難?

羅:身為監製兼演員,一開始打算拍長片時,我哋都雄心壯志。但一到咗要搵資源時,問題就嚟啦。經費要搵贊助,咁岩碰上賭收下跌,所以處處碰壁。我知佢哋都愛莫能助,唯有自己投資,周圍搵朋友兄弟「拍硬檔」,所以成個劇組嘅成員都可以話係贊助商,因為佢地付出咗寶貴嘅時間。

花:作為導演,為咗遷就兩個大型馬拉松賽事,我哋只能將拍攝期延長,所以人員上經常要有調整。而且背負咗咁多朋友嘅共望同支持,唔可以「爛尾」,死都要死掂佢!就同戲名《逆著風》一樣,要「頂硬上」!各種場地、人員、資源嘅協調問題,雖然艱難,但肯去問、肯去做,都係會迎刃而解嘅。

梁:身為副導演,除左要負責拍攝、各種組員嘅協調,亦要主理影片嘅後期製作。尤其係澳門拍馬拉松嘅戲份,由於主角真係親身參賽,所有鏡頭都係一Take過,結果係要將一堆雜亂無章嘅鏡頭重新組織為一個故事段落,而且要比導演更「狠心」,將不必要嘅部份剪掉。

高雄忠烈祠樓梯前
高雄忠烈祠樓梯前

記:資源上既然有咁大困難,你地又要如何克服?

花:當初我哋拍攝時,有人問我,點解唔搵咗贊助先開拍?搵到嘅當然好,但我當時諗,要搵贊助,係咪起碼要有啲嘢畀人睇到先?所以我先做咗個前期預告,等人知道我哋係做到嘢嘅。邊拍邊籌錢,一直保持住有新嘢畀人睇到。與其等運到,倒不如行咗先。

綠島嬉水
綠島嬉水

記:拍攝過程有咩難忘經歷?

羅:成個過程超好玩!同時亦超辛苦!因為台灣部份要喺幾日時間內拍完,必須要馬上入戲。喺台灣每日瞓幾粒鐘,又要即刻做嘢,全無間斷。第一日到達綠島要搭外景,點知連夜大雨,行雷閃電,我地仲揸住個鐵架裝篏,萬一「被雷劈」就非同小可,直情係搵命搏。點知第二日竟然又陽光普照,曬到皮都傷哂。然後最後一幕,為咗要影我衝線嘅鏡頭,我真係要跑足全程,嗰次亦係我第一次完成全馬!雖然辛苦,回憶返又會覺得好開心,因為一班人,同樣對電影有夢想,合力去完成一件事,非常有滿足感。

於西灣湖取景
於西灣湖取景

記:呢次拍攝帶畀到你地咩經驗或得着?

花:呢次拍攝,我明白到好多程序手續上嘅申請要點樣進行。尤其台灣對於電影工業嘅政策同安排,政府部門對於電影拍攝嘅靈活協調,值得澳門借鑑。以及後期發行同上映等安排,都係平日上堂唔會教你嘅。雖然我哋嘅電影受資源緊絀限制,但最後都尚算滿意。

梁:電影宣傳片亦獲得網民唔錯嘅反響,有啲朋友會特意引用返我哋嘅台詞作為「金句」,例如「堅持到最後即是贏家」,原來啲台詞可以觸動到佢哋嘅心靈,都覺得幾有成就感架。

麥:我地早前搞過宣傳活動,晨早六點半上松山跑步,竟然真係有人特登出嚟搵我哋,仲有唔少跑友認得我哋,呢啲「堅.粉絲」令我哋覺得好感動。

拍攝情況
拍攝情況

記:對澳門電影產業現況有咩睇法?

梁:近年多咗好多拍攝微電影嘅課程,我覺得係一件好事。但亦要接受目前依然係起步階段嘅現實,保持樂觀心態,相信以後會越來越好。決策者其實可以撥錢去嘗試多啲新嘅事物,俾多啲機會新人,新嘅局面先可以打開。

麥:正如跑馬拉松一樣,路上雖有眾多不相識嘅跑手,但擦身而過時亦會向你講聲「加油」,互相支持,呢種精神好好。電影圈亦應如是,與其互相批評,何不互相幫助?

記:最後,有咩說話想同大家講?

花:只要唔死,都總會有用嘅!希望各位珍惜來之不易嘅一切!

羅:有目標、有行動、有堅持,一定有成功!

梁:澳門人,一定要支持澳門電影!

麥:11月18至20號,永樂戲院七點半,記得入場支持澳門獨立電影《逆着風》!

(訪後餘記:《逆著風》講述馬拉松,而對呢幾位電影「初哥」而言,拍攝嘅過程亦好比一次馬拉松賽事,係精神與耐力嘅試煉。而最後佢哋亦不負初心,「跑足全程」,但呢個只係第一步,佢哋能夠喺呢次賽事得到咩成績?大家拭目以待。)

white-picture-a2-poster_ai16_ol_re

逆著風 (Against the Wind)

https://fb.com/against.the.wind.macau/

2016年11月11日銀河UA首映

2016年11月18、19、20日永樂戲院晚上7:30公映

“【人物講嘢】逆著風” 有 1 則迴響

  1. 好難得澳門自資拍成這麽認眞的電影。 很喜歡電影中的訊息, 也很感動電影隊的精神! 希望從這套電影中, 會啟發更多人對製作電影的興趣, 並得到澳門政府更多的支持!

發表迴響