【人物講嘢】周佩玉 Christina(手作人)

近年本澳嘅文創店舖如雨後春筍,但有返咁上下歷史嘅店或者品牌,都係比較少見。本地手作「元老級」品牌手作瘋,經歷過文創發展嘅起步期,再由實體店轉戰網店,品牌仍然屹立不倒,足可見創辦人Christina嘅「手作魂」係幾咁堅持。

記:Isaac C:周佩玉 Christina

記:Hi Christina,請問妳現在嘅職業身份?

C:我係一位手作人,以前主要做飾物,而家主力做手袋設計,以及手工護膚品,亦有開班授課,正職於電視台任職多媒體設計師。

Blingbag散銀包
Blingbag散銀包

記:講下手作瘋嘅經歷?

C:本身畢業於理工學院多媒體設計,亦都好鍾意做手作飾物,但喺澳門好難搵到手作用嘅材料。喺2010年,機緣巧合之下,信達城七樓有青年創業租金優惠計劃,就試下開店,當時可以話係澳門第一間嘅手作舖頭,由教學、材料至到寄賣,係一個手作行業嘅平台。後來商場加租,轉咗去細啲嘅舖,於是另外又喺中星商場租工作室。再過咗一段時間,仍然係要面對租金難題,考慮到兩個地點難以兼顧,終於相繼放棄實體店,轉移陣地至網上,交俾其他店舖寄賣,以及同唔同嘅機構合作開手作班。

手工護膚品製作班
手工護膚品製作班

記:目前手作瘋嘅產品?

C:目前以自家設計嘅手袋,以及手工護膚品為主。

Blingbag手袋
Blingbag手袋

記:近年本澳文創發展看似不錯,有無打算再次全身投入,或者開店?

C:我覺得既然都曾經試過開店,唔一定要用返呢一種形式,仲有其他形式較適合目前嘅情況。例如可以同其他機構或品牌Crossover,由我提供設計,佢地負責生產,亦可以將手作元素結合到不同嘅活動盛事當中。我會傾向以教學同推廣手作文化為主。

自製的護膚品
自製的護膚品

記:手作瘋嘅未來發展計劃?

C:我仲有好多設計未生產出嚟,希望可以製作多幾個款,收多啲學生,擴大手作人圈子。仍然會以少量、獨特、客製化為生產策略。就以碎銀包為例,同一個設計,會有唔同嘅花紋或者物料,每個款可能只有十個,盡量唔重覆,保持每件產品嘅獨特性。

Blingbag散銀包另一款式
Blingbag散銀包另一款式

記:澳門嘅市場情況如何?政府可以點樣推動文創?

C:近年推出嘅文產基金,資助嘅門檻高,小企業難以加入。唯有用手作人協會去申請活動資助,但資金都唔多。好在政府有持續進修計劃,有唔少教育機構會同手作人合作開班,吸引好多人報讀,間接令我地受惠。感覺政府集中支持電影、服裝、繪畫等。

政府近年大力推動文創項目,大家其實都係搏一舖。長期經營要睇實力,要可以同外地品牌競爭,唔可以比下去,因為澳門人都較崇拜外來品牌,所以產品一定要達到其他地方嘅水平,要令人覺得有價值,要Proud of it,將作品打造成一個品牌去行銷,希望澳門嘅品牌能夠堅持落去,取得真正嘅成功。

記:最後,有無說話想同大家分享?

C:喺人生嘅唔同階段,要做唔同嘅事,最重要係實踐到自己嘅理念,只要有試過,奉獻過,最終都會令自己有所得著。

(訪後餘記:由零開始、到開實體店、擴張、再轉移到網店及寄賣,經歷文創發展嘅高低跌宕將近十年,至今仍然能夠繼續經營自家品牌,喺澳門嚟講真係非常難得,有時候,面對困難時期,及時作出轉型判斷,亦係將理想堅持落去嘅重要一著。)

記者/Isaac

手作瘋X瘋手作生活crazycraftlife

https://fb.com/crazycraftmacau

「只要有試過,奉獻過,最終都會令自己有所得著。」
「只要有試過,奉獻過,最終都會令自己有所得著。」

發表迴響