【人物講嘢】梁宗環 Niuniu(手繪小物藝術總監)

每次行藝墟,小編都會留意手工同手繪嘅作品,因為人手整嘅嘢,每件都有一種獨一無二嘅「溫度」同埋「觸感」,無法代替亦無法複製。今次介紹嘅手繪小物,顧名思義,以抽象風格嘅手繪飾物而為人認識,就等我地聽下創辦人Niuniu講下手繪小物背後嘅故事。

記:Isaac N:梁宗環 Niuniu

記:Hello Niuniu,請介紹一下您嘅身份?

N:我係手繪小物嘅創辦人及藝術總監,主要負責手繪插畫、設計產品同製作手作飾物。我同時喺非牟利社團入面從事推廣澳門世遺嘅工作。

手繪小物產品一覽
手繪小物產品一覽

記:當初點解會成立手繪小物?你地有咩產品同服務?

N:幾年前出版一本畫冊,發覺有唔少人支持,令我有信心繼續創作。喺兩年前,無任何嘅計算同準備之下,突然諗到手繪小物呢個名,於是就成立咗呢個品牌,係好自然而然咁去做。之後先至聯同一班志同道合嘅朋友一齊去經營。主要嘅產品有手作飾物同埋畫册,大部分係純手工製作,利用木片同牛皮紙等天然材質,以Marker繪上顏色,包括明信片、印章、書籤、匙扣、鏡等等。我地會參加藝墟,亦會開手作班,對象包括社團、企業、政府、長者及一啲親子課程。

03
手繪小物產品一覽

記:你希望手繪小物呢個品牌帶俾人地咩感覺?

N:希望通過手繪插畫,傳播正能量,為大家傳達鼓勵。同埋因為知道好多小朋友都唔鍾意食菜,為咗吸引小朋友食多啲蔬果,我地創作咗蔬果娃娃,佢係為咗推廣飲食均衡而誕生嘅角色,會喺我地嘅產品入面見到佢地嘅身影。仲有就係大家平時睇澳門嘅世遺,較少留意細節,我希望大家細心欣賞,發掘背後嘅故事,所以就結合自身文物大使嘅工作,將歷史知識融合喺作品入面,以趣味手法推廣澳門世遺。亦會嘗試使用唔同媒介去創作,帶嚟新鮮感,好似上次收集一啲被丟棄嘅咖啡膠囊,用嚟創作產品,宣揚環保理念。

多次參與塔石藝墟
多次參與塔石藝墟

記:你當初係如何學習繪畫及手作?

N:自小鍾意畫畫,但無乜自信,畫完都係自己收埋唔俾人睇,後來先至慢慢放膽。我無正式學過藝術同繪畫,大學都係修讀廣告,所有嘢都係隨心所欲咁去畫,亦無刻意參考某一個名師嘅風格,追求視覺舒服嘅簡單線條,有啲抽象風格,配合鮮明色彩。

與不同機構合辦藝術工作坊
與不同機構合辦藝術工作坊

記:未來有咩活動?會唔會考慮投入更多去發展?

N:除咗手繪小物之外,今年成立咗夢啓航協會,係一個平台,感染更多人為夢想啟航,協會有唔同行業嘅人士,有甜品師、中醫師等等,會籌備探訪老人、入學校舉辦手作坊等活動。太過商業化會有壓力,擔心會令經營方向變質,暫時會傾向於維持現狀。

澳門景點小印章
澳門景點小印章

記:對政府嘅文創政策有無意見?點睇發展前景?

N:我好慶幸,現時社會對文創嘅支持都好多,可尋求嘅資源亦多,政府開闢唔少地點舉辦藝墟。我希望可以多啲宣傳澳門嘅文創,以及支持我地走出去,睇下外地嘅文創品牌經營。澳門始終係遲過人地起步,人地甚至有埋大學專科,文化氣氛濃厚,市場成熟,值得澳門學習。當然,澳門嘅創作者自己都要努力做出成績,俾政府同埋大眾睇到,先至會有人欣賞。

水松木墊
水松木墊

記:最後,有無說話同大家分享?

N:有夢要去追,唔好怕失敗,過程必定有得著,有夢想,人都變得美麗!

(訪後餘記:手繪小物嘅手工作品,或者喺好多人眼中只係一啲普通小玩意,但就係呢啲簡簡單單嘅小物品,證明咗無論自身條件如何,成長環境如何,只要憑住積極同樂觀嘅態度,願意走出第一步去嘗試,都可以闖出一片小天地。)

facebook:手繪小物

記者/Isaac

「夢想令人變得美麗。」
「夢想令人變得美麗。」

發表迴響