【人物講嘢】馬志達:澳門立根基,放眼大灣區

《廣野》自2015年創辦以來,訪問過將近二百位人物,每位人物都各有特色。嚟到今期【人物講嘢】,我哋終於請到一位最能代表我哋嘅重量級人馬——廣野社長、澳門廣州地區聯誼會理事長、東西匯(橫琴)發展有限公司董事長馬志達先生,同各位讀者分享一下我哋《廣野》嘅創辦理念,以及未來發展方向,同時,佢亦提出唔少建議,指引澳門青年捉緊大灣區嘅發展機遇。

攝於橫琴.澳門青年創業谷(圖片來源:環球人物網)

記:Isaac

馬:馬志達

記:社長你好,回首返呢幾年,當初點解會創辦《廣野》進軍媒體範疇?今時今日,紙媒市場息微,網媒競爭激烈,你又點樣去面對?

馬:媒體係社會大眾接收資訊及發表意見嘅重要平台,喺社會上有著重要功能,所以我哋就以青年人為目標對象去營運《廣野》。即使紙媒市場隨住時代發展日漸萎縮,但其實每個行業都有其困難,視乎點樣去尋求生存空間。正如通訊技術不斷變化,由傳呼機到手機,由紙媒到網媒,目前都未必係行業嘅最終形態,只不過睇下你點樣去適應。《廣野》由當初嘅雙周刊到月刊、由新聞時事到文青風、由聚焦澳門本土資訊擴展到大灣區風土人情,都係不斷咁去嘗試,以紙媒為基礎,再喺網絡發佈上尋求各種突破,增加更多元素,隨住市場發展去改革、變陣。

記:你希望《廣野》喺澳門人嘅心目中係一份點樣嘅媒體?

馬:《廣野》係一份開放嘅媒體,為青年人提供發聲機會,特別係一啲主流媒體較少接觸到嘅,或者係某啲行業嘅新晉青年人。我自己都係青年嘅一份子,我哋希望話畀讀者知道,喺澳門,存在住一批有為青年,嚟自唔同行業,有唔同夢想,默默咁為澳門貢獻,努力咁去達成夢想。

《廣野人物誌3》是【人物講嘢】欄目的最後匯總

記:《廣野》有何未來發展計劃?

馬:《廣野》創刊至今已有一段時間,累積咗一定人氣,仍需不斷進步,我哋本身亦係屬於新創嘅媒體,到咗一定時候就要向上發展,尋求進步空間。而隨住大灣區政策出台,我哋會逐步放眼大灣區,例如最近介紹咗一啲廣東美食,以及一啲灣區城市嘅歷史,新創媒體必須要往外走,唔應該局限喺澳門,走入更大嘅平台,向國內嘅人,展示澳門年青人嘅文化,同時亦畀澳門人了解大灣區嘅情況。現階段我哋係處於準備狀態,蘊釀經驗,儲備資訊,到時機會嚟到,就能隨時落實具體項目。

記:社長近年亦有進駐橫琴投資,可否分享一下你對橫琴發展前景嘅睇法?

馬:橫琴嘅潛力而家仲未完全展現,佢同澳門相鄰,交通方便,兩地將來會喺生活上、環境上、體制上逐漸拉近,慢慢變成適合澳門人居住同工作嘅地方,而家見到嘅只係初步,將來會融合得更好,發展前景會更好。橫琴係澳門人走進內地嘅跳板,由呢度起步,再跳去大灣區內其他城市,可以話係進入國內發展嘅基石。

馬志達的公司東西匯是最早期進駐橫琴的澳門企業之一

記:東西匯主要經營咩範疇嘅業務?

馬:東西匯個名係表示東西方匯合之意,亦代表國內與澳門融合,以青年創業、文化產業、室內娛樂體驗三大業務方向為主。我哋關注青年創業,以新模式去扶持園區內嘅青創企業,製作各類新式舞台表演,融合各地嘅文化元素,亦會打造VR及AR體驗店,營運相關場地。

記:可以講解一下橫琴會有咩類型嘅產業嗎?

馬:目前處於建設階段,需要建築、工程、材料供應相關等行業,先做好基建,為將來準備。橫琴各個項目落成後,會吸引好多遊客觀光,或者居民遷入,需要商家去營運各種生活配套,服務業亦係必需。

馬志達認為橫琴和澳門將來會在生活上、環境上、體制上逐漸拉近

記:澳門青年如果想進入橫琴或大灣區,有咩行業適合?

馬:澳門以博彩業為龍頭產業,強項就係服務業,包括會展、酒店、餐飲,年青人可以以上述行業作為首要進駐發展目標,而橫琴將來其中一個經濟來源係以旅遊業為主。澳門青年如果想適應國內環境,進駐橫琴就係最好嘅第一步,我自己就已經身體力行,東西匯係最早進駐嘅一批企業。大家要提早了解國內發展,分析灣區經濟,做好準備,等到所有嘢都開始曬先去了解就會太遲。大灣區內各個城市各有定位,近嘅話就有橫琴、珠海,科技行業可以去深圳,貿易就要去廣州,要先清楚了解自己嘅能力同發展方向,再睇下去邊個城市有優勢。

辦公室內掛有祖父馬萬祺先生的字畫

記:請為《廣野》過去嘅工作做一個總結吧。

馬:《廣野》一直默默耕耘,為年青人搭建發聲平台,累積咗一班忠實讀者,總算係取得一點成績,不過我哋從不自滿,仍然努力改革求變。隨住時代進步,我哋將會放眼大灣區,以澳門為根基,朝往大灣區邁進!

記者、攝影/Isaac

在馬社長的帶領下,《廣野》將會不斷創新求變

發表迴響