【人物講嘢】吳文慧:希望每年夏天舉辦一個主題展,澳門係第一站!

近年澳門舉辦咗唔少風靡一時嘅卡通角色主題展,好多人都為咗重溫童年回憶而慕名而來,掀起一陣熱話。而澳門之所以引入到呢啲咁好玩嘅展覽,全因為有一班敢搏敢試嘅會展公司,努力不懈咁去同品牌洽談,先至可以將呢啲卡通人物帶嚟澳門。今期我哋就訪問到澳匯展覽嘅吳文慧(Eva),同我哋分享佢點樣引入主題展、打造澳門嘅展覽品牌、以及對青年創業嘅一啲睇法。

記:Isaac

E:吳文慧(Eva)

記:Eva分享一下當初係點樣成立會展公司?

E:我由2005年開始成立自己嘅廣告公司,因為我係讀平面設計出身嘅,公司主要係做平面設計。近幾年慢慢發覺政府大力推動會展業發展,不如就跟住政府嘅趨勢行啦,咁就同拍檔盧德忠合組澳匯展覽。

亞太婚慶博覽2018(圖片由受訪者提供)

記:你哋自己係會做邊類型嘅展覽?

E:做展覽公司,好多時都要諗一啲唔同嘅主題,好似我哋嘅亞太婚慶博覽,每年都會做兩次,而我哋自家品牌「玩樂達人」算係一個成功嘅展覽品牌,雖然唔係賺到錢,今年已經係第五屆舉辦,喺澳門都好多人認識,所以我哋會堅持繼續做。

玩樂達人暨玩具博覽2015

記:講下你哋近年好熱門嘅主題展,小丸子同Sanrio展嘅經驗?

E:最大嘅轉捩點就係2016年,舉辦咗「櫻桃小丸子學園祭-澳門站」,呢個做法係將佢哋本身嘅展覽引入嚟澳門。值得一提嘅係2017年嘅「Our Sanrio Times」,係一個全新嘅概念,Sanrio公司咁多年嚟都未試過做一個100隻角色嘅主題展,我哋咁啱搵到Sanrio同佢哋傾,一齊去創作呢個主題,係其他地方都未做過,而澳門係首次去做,一次過回顧Sanrio嘅歷史,我哋洽談籌備超過一年時間。好開心Sanrio好信任我哋,放手畀我哋去設計。

玩樂達人是澳匯原創的展覽

記:認為主題展喺澳門嘅市場反應如何?

E: 澳門係以世界旅遊休閒中心作定位,我哋認為除咗賭博之外,應該有更多元化嘅活動發生喺澳門,係可以一家大細參與嘅活動,無論係遊客同本地人都可以參加嘅。其實各個主題展嘅反應可以相差好遠,當中好大程度取決於IP(智識產權)角色嘅名氣,仲有就係每個IP嘅合作方式都唔一樣,有啲成本較高,亦有成本較低嘅。

小丸子學園祭2016澳門站
小丸子學園祭2016澳門站

記:公司未來有咩發展方向?

E:以後每年暑假都做一個主題展,澳門永遠係第一站!之後我哋再將呢啲主題展外銷去東南亞或者其他地方。今年嘅主題展已經傾緊,大家七月就會知道。當然,我哋都想繼續創辦一啲新嘅主題,因為如果只係買IP嘅話,始終都係受限於人哋,呢個都係我哋公司希望將來能夠做到嘅嘢。

小丸子學園祭2016澳門站

記:你認為目前做展覽面對緊啲咩困難?

E:我上個月去咗一間中學,教咗一堂關於展覽嘅課堂,我就問嗰啲中學生,有無聽過或者去過我哋某個熱門嘅展覽,原來有唔少人都未聽過,亦無去過,佢哋而家唔睇facebook,只係睇Snapchat,而我唔知Snapchat係咩嚟。跟住我知道,我搞咁多個活動,都只係喺facebook宣傳。佢哋亦都唔睇街邊派嘅傳單,唔睇報紙、雜誌,只係會睇學校入面嘅海報。所以我哋做會展嘅,喺思維上同埋宣傳手法上都要創新先得。

小丸子學園祭2016澳門站

記:你有咩創業心得可以分享畀澳門嘅青年?

E:對於青年人嚟講,創業之前要了解澳門嘅環境,了解個市場,事前準備嘅嘢要好充足,同埋攞多啲經驗先好去創業,咁樣對年輕人嚟講,我覺得會比較穩重,之後對公司嘅運作嚟講,都係一個成功嘅表現。

Our Sanrio Times 2017

記:最後分享一句說話畀讀者?

E:機會,係留畀隨時準備嘅人。

(訪後餘記:會展業需要不斷創新,與時並進,緊貼潮流都已經唔夠,甚至要負責帶領潮流,將最新最潮嘅資訊同服務,展示畀普羅大眾去體驗感受。Eva獨具慧眼,搶佔先機,率先為大家帶嚟多個新展覽,豐富澳門人嘅參展經歷,期待未來引入或創造更多有趣好玩嘅主題展喺澳門舉辦。)

發表迴響