【人物講嘢】黃紀石:創作「水桶王」彌補兒時遺憾

BUCKET KING 創辦人黃紀石(Case),以自己同兩個小朋友嘅生活點滴為靈感,結合多啦A夢同幪面超人嘅概念,創作出本地動漫角色「水桶王」,原來呢個角色嘅來源,亦係嚟自佢年少時嘅一啲遺憾,不過有心就唔怕遲,如今,佢兒時嘅夢想總算得以逐步實現。

水桶王的故事靈感來自阿石的兩位小朋友

記:Isaac 石:黃紀石(Case)

記:請問阿石目前主要嘅工作係?

石:我係一個平面設計師,創辦咗自己嘅廣告公司,擔任設計總監,亦係Bucket King品牌創辦人。

記:介紹一下今次喺聖公會青年本色嘅水桶王展覽?

石:首先好多謝聖公會畀呢個機會我,聖公會嘅青年本色係一個幫助青年實現夢想嘅平台。今次嘅展覽係展示水桶王奇幻歷險第二期繪本,呢個展覽亦係以繪本嘅內容作為主題,早前已經推出咗第一期,今期嘅劇情係講膽怯小地鼠如何重拾勇氣拯救水桶王。我希望家長可以同小朋友一齊閱讀,領會當中嘅細節同埋道理。

水桶王與百變羊

記:點解會創作水桶王呢個角色?

石:水桶王嘅創作其實係原自一個遺憾,我喺中學同埋大學嘅時候已經好想出漫畫書,因為當時澳門冇呢啲平台,暫時無法實現,唯有擱置。人大咗,出嚟工作一段時間,社會上亦有發展文創嘅大趨勢,有條件同埋機會,於是就喺上年籌備水桶王呢個角色,出版第一期繪本。

水桶王加入了不少本地特色的內容

記:水桶王嘅靈感來源?介紹一下呢個角色?

石:我係兩個小朋友嘅爸爸,創作靈感源自我同佢哋嘅生活,劇情入面有好多佢哋嘅影子,同埋一啲屬於澳門嘅特色元素。得意嘅係,我同我嘅小朋友都好鍾意幪面超人同埋多啦A夢,兩個唔同年代嘅人都鍾意相同嘅動漫角色,其實好有趣。我細個嗰陣好鍾意笠住個水桶周圍搗蛋,所以就用水桶呢個形象,去創作水桶王嘅角色,令小朋友易代入,因為呢個角色係矇住面,見唔到佢嘅真實面貌,小朋友會以第一身角度去想像。

戴著水桶四處搗蛋的水桶王

記:水桶王未來會點樣發展?

石:會繼續塑造形成角色性格,推出一系列故事書,生產周邊產品。目前製作緊一套水桶王嘅動畫,我希望可以同唔同範疇嘅人合作,一齊去推高呢個角色嘅知名度。

記:你認為澳門目前嘅動漫發展如何?

石:澳門動漫發展仍然係好初步階段,而香港、內地已經行得好快,目前澳門可以利用各種平台,嘗試與國內或香港嘅動漫單位合作,睇下可以有咩發展。

水桶王的奇幻歷險

記:有咩說話想同讀者講?

石:年青人如果有諗法,就要去做,唔好畀自己有遺憾!

水桶王搪膠figures

(訪後餘記:胸懷一顆赤子心嘅阿石,即使已為人父,依然不忘初衷,直到今日終於可以實現佢兒時嘅夢想,呢層亦都多得澳門近年多咗各種平台助人圓夢,令佢嘅想法可以趕上文創發展嘅列車,所以話,只要有心就唔怕遲,而且,今時今日可能先至係最好嘅時機添!)

記者/Isaac

Bucket King

https://fb.com/bucketking.net/

聖公會青年本色 Sheng Kung Hui Youth Works

https://fb.com/skhyw/

大型水桶王現於聖公會青年本色展出
展覽位於氹仔聖公會青年本色

發表迴響