【人物講嘢】陳凱琪(音樂教師)

為咗自己喜歡嘅事業,即使面對巨大壓力,都可以排除萬難,迎難而上,甚至利用壓力令自己有所提升。音樂教師陳凱琪(Hidy)融匯貫通中西音樂,不斷進修教學新知識,憑住堅定意志穩步前進,終於拉出一片音樂天空,更譜出職業提琴手嘅新篇章。

Hidy提琴、古箏皆精,樂貫中西

Hidy:陳凱琪 Hidy 記:Isaac

記:Miss Hidy介紹一下目前主要嘅工作?

Hidy:目前以小提琴及古箏嘅教學為主,任教中學興趣班、奧福音樂兒童啓蒙班、文化中心暑期藝術工作坊等音樂課程,亦會有獨奏及弦樂四重奏演出。

2011年愛之小提琴獨奏會澳門場(圖片由受訪者提供)

記:當初係點樣開始接觸音樂?點解會選擇小提琴呢種樂器?

Hidy:細個嗰陣媽咪帶我去學鋼琴,但學咗一段時間就冇興趣。去到初中,學校開設小提琴興趣班,突然心血來潮又想學,返屋企問准媽咪就開始喺學校學。起初進步較慢,拉到好似劏雞咁聲,諗住學多一排就放棄,老師謝瑋琳就鼓勵我哋,話如果拉得好就可以出去跟老師學,我就開始的起心肝去練。後來考完二級,老師帶我去揀琴,揀咗一把四千蚊嘅琴,當年算係好貴,但媽咪一口就答應咗,仲話要學就要用最好嘅,令我好感動,更加決心要學好佢。中學時候嘅我其實都好混混噩噩,學業成績麻麻地,反而決心學琴之後,突然開咗竅,用練琴嘅意志去讀書,成績急起直追。記得高三時,中午喺學校附近食個飯,就要喺學校做功課同溫習,返屋企就全力練琴,夜晚仲要學埋樂理,而家諗返都覺得自己好搏。

2013年母校聖羅撤80週年晚會中西合壁表演(圖片由受訪者提供)

記:學咗西樂嘅小提琴,點解又會學埋中樂嘅古箏?

Hidy:有一次經過商場,見到有人彈揚琴,叮叮噹噹覺得幾好聽,又想學下,媽咪就帶咗我去琴行查詢,期間媽咪表示佢好喜歡古箏嘅聲音,所以就變咗學古箏,跟住每個星期日都要過關去拱北上堂,係辛苦咗啲,不過老師都好照顧我,有時落堂後仲會喺佢屋企食埋飯先走。

2014年羅志祥世界巡迴演唱會澳門站(圖片由受訪者提供)

記:分享一下去台灣攻讀音樂師範嘅經歷?

Hidy:讀高中時,開始諗大學要讀咩科呢?思前想後,覺得自己唔適合做行政,亦唔想牽涉辦公室政治,最鐘意都係音樂,於是就揀咗台灣師範大學嘅音樂系,主修小提琴,副修古箏,再多修師範教程。去到之後發現同學嘅水平都好高,初時係好有挫敗感,音樂系嘅同學只有我一個澳門人,意識到要更加勤力先可以追到。另外有個好有趣嘅情況,就係要喺臨考試嘅時候,大家都要爭琴房練琴,因為攞唔到琴房就冇地方可以練,所以啲人晨咁早著睡衣踢拖鞋就去排隊,又因為每間房最多只可練兩個鐘,啲人用完一間就要跑去第二間,好瘋狂。

2014年參加美國三藩市奧福音樂導師活動(圖片由受訪者提供)

記:係咩原因令你決定以音樂為事業?

Hidy:以前澳門係冇乜音樂相關職業,基本上只有學校或者琴行可以選擇,當年揀音樂系嘅時候都有諗過,讀完返嚟即使只係做幼稚園音樂老師,我都好享受,只要係同音樂有關就可以,咁點解唔去試下?畢業後返嚟,先去琴行教,後來去咗母校教興趣班,逐漸認識唔同嘅音樂朋友,音樂人嘅圈子都好緊密,亦都因此同朋友組成弦樂重奏,又因為澳門全職拉小提琴嘅人較少,所以漸漸都多咗人搵我。

2016年澳門光影節演出(圖片由受訪者提供)

記:你覺得現時嘅學生,對學習音樂嘅態度如何?

Hidy:而家嘅家長好著重音樂教育,以奧福音樂嘅Playgroup為例,我教咗五年,就有學生跟咗我五年,而家仲組咗隊Band,成員都係六、七歲左右。第一屆做匯演時只得幾班人,而家多咗幾倍人數。另外都因為小提琴較輕便,價格相宜,一堂可以同時教好多人,亦令好多學校多咗小提琴課。不過而家啲學生好忙,好多嘢做,功課甚至要拍埋片嘅,興趣班選擇更加多樣,少咗時間練琴,而且人人有手機,個個忙於社交,易於分心,較難堅持。

年度師生音樂會(圖片由受訪者提供)

記:你認為目前嘅音樂演出市場如何?

Hidy:試過為羅志祥、胡夏嘅現場演出拉奏小提琴,婚宴、晚會、會議、展覽等等活動,都有需要弦樂演奏,演出機會比以往多咗好多。

記:未來有何發展方向?

Hidy:演奏方面,會繼續跟名師學習,不斷提高演奏技巧,與志同道合嘅音樂人合奏,舉辦音樂會分享音樂。教育方面,想為自己嘅小提琴同古箏學生舉行定期合奏訓練,令佢哋感到學習樂器並唔孤單。另外仲會繼續推廣德國音樂家奧福(Carl Orff)發明嘅奧福音樂教育法,呢種專為小朋友而設嘅教育方法,以身體律動去感受同學習音樂,係非傳統嘅方式,著重合奏,我亦為此遠赴美國修讀奧福音樂導師課程三年,希望可以活用喺澳門嘅音樂教育當中。音樂人一定要謙卑,不斷進修,出過去之後,你會發覺音樂嘅世界好大,自己永遠都有不足。

2017年超模大賽四重奏演出(圖片由受訪者提供)

記:最後,向讀者分享一句說話吧。

Hidy:人因夢想而偉大,而能夠成就別人夢想嘅人更偉大。我好感恩喺我生命中出現過好多良師益友,佢哋成就咗我嘅夢想,我想喺度對佢哋表示衷心感激!

(訪後餘記:要做一個全職樂手,當中投入嘅苦功絕對唔會少,好似Hidy專修兩門中西樂器嘅樂手就更加罕有,而即使已磨礪十載,在音樂路上已獲得肯定,仍然心懷謙卑,繼續去發掘音樂世界嘅無限可能,Miss Hidy對音樂嘅態度,更加值得大家學習。)

記者/Isaac

Miss Hidy Chan

https://fb.com/hidychanmusic/

「人因夢想而偉大,而能夠成就別人夢想嘅人更偉大。」

發表迴響