【人物講嘢】盧德忠(澳門國際新創週組委會執行副主任)

第一屆澳門國際新創週於十一月二十日至二十六日舉辦,相信各位有志創業嘅青年,都想知呢個「新創週」到底同一般嘅創業論壇有咩唔同?今次我哋就邀請到「新創週」組委會執行副主任,同時亦係澳門青年企業家嘅盧德忠(忠哥)為大家介紹一下首屆「新創週」有啲咩新意思啦。



忠︰盧德忠 記︰阿傑

記︰忠哥可以介紹一下「新創週」有啲咩特色?

忠︰「新創週」最大嘅特色就係獨特嘅模式,唔同於純粹嘅分享會,亦唔同外國嘅展覽,而係將兩種模式平均結合一齊,既有經驗分享會,亦都有創業展覽,我地有超過60位嚟自世界各地嘅講者同埋80個參展項目,而且現場設有一對一導師諮詢同埋多個工作坊,仲會舉辦商業比賽幫助參加者更了解商業運作。

新創週記者招待會(圖片由受訪者提供)

記︰點解會有「新創週」嘅諗法?

忠︰因為澳門之前未做過同類嘅活動,我覺得而家澳門需要一啲新模式嘅商業展覽活動,亦都需要有人去做呢種新嘗試,正如「新創週」有成熟嘅商業經驗分享,又有各類型商業項目展示,咁樣澳門嘅創業人士就有機會學習到更多商業知識。其實而家澳門嘅展覽面對嘅困難就係人氣,因為澳門人少,如果展覽要取得成功就需要不斷創新同埋突破,而呢個係我一直以嚟從事會展業嘅信念,亦係「新創週」嘅目的之一。

記︰今年係第一屆「新創週」,你哋有冇想要達到嘅成果?

忠︰主要目標係希望入場人次可以去到八千至一萬人,因為今次「新創週」係一個新嘗試,搭建一個舞台畀創業者去展示佢哋嘅創意同埋實力。我哋想鼓勵年青人大膽思考同創新,而家有好多「孵化器」去幫佢哋起步,只要佢哋嘅創意或者計劃說服到投資人,創業就會冇咁困難。無論係唔係創業者都可以過嚟睇下,可以嚟尋求合作伙伴,亦可過嚟學習新嘅商業思維。

記︰喺籌備「新創週」嘅時候有冇遇過咩困難?

忠︰講起困難,其實最主要都係冇經驗,雖然之前都去過好多唔同地方嘅展覽考察過,但始終「新創週」係第一次喺澳門搞,完全冇先例可以參考,唯有多啲向老行尊請教,多啲聽其他人嘅意見去改進。另一個困難就係邀請講者,唔好睇我哋有六十位講者好似好多,背後其實係邀請過幾百個,唔係個個都嚟得到,當初都驚請唔夠講者,但係好在有同行幫手。

記︰想請教下忠哥,你認為應該抱住點樣嘅態度去創業呢?

忠︰總括嚟講係要厚面皮、唔怕輸、同埋要細心聆聽!首先係要厚住面皮去上門同人傾嘢,如果連上門開聲都唔敢,仲點去創業或者說服投資者支持你呢?要唔怕輸係因為冇人一開始會成功,輸唔緊要最緊要係知輸邊到,怕輸唔去試就永遠都學唔到嘢。同埋要細心聽取其他人嘅意見,唔好一味以為自己嘅創意冇問題,唔聽人意見,咁樣好易會鑽牛角尖,永遠唔知自己錯喺邊。其實我唔係好贊成一畢業就創業,我覺得出嚟打幾年工學吓嘢,吸收唔同嘅經驗,開闊自己嘅視野再去諗要唔要創業。創業唔係想像中咁輕鬆,唔好以為創業就係做老闆可以做少好多嘢,其實要兼顧嘅嘢比想像中多好多,做老闆可能比打工仲辛苦。

新創週啓動儀式(圖片由受訪者提供)

記︰最後,有冇說話想同有志創業嘅青年講?

忠︰我覺得而家嘅年青人可能係過得太幸福,工作嘅時候冇乜鬥心,其實無論係創業定打工都好,工作態度都好緊要,做嘢要勤力,多啲去思考,對要有要求,咁樣至會有進步,未來條路先會更闊。

(訪後餘記︰作為澳門會展業界嘅知名企業家,忠哥唔單止心繫業界未來,佢亦對澳門其他創業者後輩非常關心,其實無論做人同打工,都應該如忠哥所講咁,一定要對自己有要求,而喺呢個日新月異嘅社會入面原地踏步,就好難搵到出路,望各位青年人切記。)

記者/阿傑

攝影/Isaac

「無論係創業定打工都好,工作態度都好緊要,做嘢要勤力,多啲去思考,對要有要求,咁樣至會有進步,未來條路先會更闊。」

澳門國際新創週

http://www.mis-week.com/index.php

發表迴響