【人物講嘢】容永僖(合氣道教練)

日本武術合氣道嘅主張以柔制剛,制敵而不傷敵,強調精神意識、技術運用、自我修練同友愛不爭。呢一門武術到底有咩奧妙同獨特之處呢?今日廣野邀請到修習合氣道四十年嘅和武館道場教練容永僖師傅,向讀者講解一下合氣道修習嘅心得。

記:阿賢 容:容永僖師傅

記:容師傅可否介紹一下合氣道?

容:合氣道係一門現代武術,前身由柔術演變而來,包含咗摔跌、關節技,亦會使用刀劍等兵器。而到咗創始人植芝盛平先生,佢揉合咗多種柔術同年輕時學過嘅槍術,再加上宗教嘅理念,發展成合氣道,確立「制敵而不傷敵」等理念。而合氣道至今亦在不斷演變之中,已成為相對柔和嘅武術,以體術為主,劍杖為輔。合氣道並無比賽,貫徹創始人嘅「不爭」理念。

制敵而不傷敵是合氣道的宗旨(圖片由和武館提供)

記:你係點樣接觸合氣道?

容:1973年,我第一位師父,緬甸華僑李榮生先生將合氣道帶來澳門,嗰個係武術盛行嘅年代,有好多傳統門派喺澳門,例如洪拳、詠春、蔡李佛等,年青人窮,最便宜嘅興趣就係習武。當時我因為練習柔道,認識咗李生。李生喺1973年3月正式開合氣道班,而我就係第一批學生。

赴日本小林道場総師範稽古(圖片由和武館提供)

記:修習合氣道身心上有何體會?

容:年少氣盛時,我會諗呢樣嘢實唔實用呢?合氣道相對其他拳腳功夫,技術上更講求剋制對手,唔係咁容易明白。但隨住對武術認識嘅加深,會發覺所有武術都係同樣道理,要喺時間空間內爭取有利位置,對戰中要把握到時間、佔有到對手嘅位置,簡單而言就係「攝位」。好似打鍵盤咁,你唔使望都知有冇打錯,經過不斷嘅鍛鍊,使身體能夠熟習,當遇上突發事故,身體下意識能夠即時反應,從而化解各種危機。我哋學習合氣道,最重要係精神層面,身體經常維持輕鬆嘅狀態,但仍然保持高度警覺性。

和武館道場2017年第一次審查(圖片由和武館提供)

記:合氣道分級如何?修習時間大概如何?

容:有七個級別,每四個月考試一次,如果練習刻苦有功,兩年多就可以升上黑帶。黑帶亦會分段位,四段基本上要掌握全部技術,六段係師範,八段係高級師範。基本上任何級別都可以,黑帶以下日本合氣會本部授權畀我哋自決。黑帶嘅話,我哋會有日本師傅過來主考。

合氣道體驗班(圖片由和武館提供)

記:可否講下喺澳門推廣合氣道嘅體會?

容:因為合氣道冇比賽,唔會立刻出到成績,想要加深認識又必須花多少少時間,初學者要理解唔容易,推廣較難。目前教學都會做記錄,希望能夠更有系統咁教人,並且會參考日本方面嘅經驗,斟酌改進自己嘅做法,例如我哋會照顧新學員,會搵教練個別跟進,希望能夠留住新人。我哋希望能夠有更多年青嘅學員。

合氣道兒童班(圖片由和武館提供)

記:可否向大眾推介下練習合氣道有咩好處?

容:我覺得由於現代人經常使用電子產品,日常生活上嘅自我控制力較低,好多嘢按一個制就攪掂,但合氣道唔係咁,經常需要有控制力,即使當下能夠發力出招擺脫對方,但都需要繼續去同對手抗衡,事情未完結,就一刻都不可鬆懈。武術係咁,平常做事都應該係咁樣。

女子防身自衛術(圖片由和武館提供)

記:有咩想同廣野嘅讀者講?

容:我今年六十四歲,但同後生仔一齊練習都係毫無問題,呢個係我練習合氣道嘅得着。

(訪後餘記:喺當下資訊爆炸、科技急速發展嘅時代,人越來越依賴機器,百無聊賴、無所用心。為免出現機器越高能、人越「低能」嘅局面,可能係時候要還原基本步,重新審視一下生活嘅基本目的同意義。雖然哲學咗少少,但練習武術,不失為修心養性嘅第一步。)

記者/阿賢

攝影/Isaac

和武館道場合氣道會 Wabukan Dojo Aikido Association

https://www.facebook.com/wabukandojo/

「我今年六十四歲,但同後生仔一齊練習都係毫無問題,呢個係我練習合氣道嘅得着。」

發表迴響