【人物講嘢】飯田妹(手作工藝坊)

人生中能夠有兄弟姊妹互相扶持,係一件值得慶幸嘅事。今日介紹嘅樊家姊妹,佢哋除咗喺同一個家一齊成長之外,更加一齊培養手作工藝嘅熱愛,各自有擅長嘅手藝,可謂各有千秋。早年,四姊妹共同創立「飯田妹」手作坊,落戶水坑尾文創村,一同踏出夢想之路嘅一步。

文創村2樓的飯田妹手作店

Ling:樊笑玲 Yuki:樊少玉 記:Isaac

記:請兩位自我介紹一下?目前喺店舖嘅主要工作?

Ling:我係做布藝嘅,以繡金包為主,提供布料等原材料,教授針黹技術,畀客人可以自製。現時澳門教育已忽略家政及針黹,我哋會喺學校或者其他機構舉辦工作坊,希望可以推廣呢方面嘅技術。

Yuki:我係以拼豆為主,提供各種顏色嘅拼豆畀客人自製及訂製作品,產品有匙扣、音樂盒、心意卡、相架及書籤等。

樊笑玲(Ling)
樊少玉(Yuki)

記:品牌嘅由來?點解叫呢個名?

Ling:我哋樊家有四姊妹,樊與「飯」同音,四個口組成一個「田」字,產品走日系風格,故此取一個日式嘅名「飯田妹」,亦有象徵我哋一家嘅意思。店舖由二〇一六年七月開設至今。

樊家四姊妹(圖片由受訪者提供)
新張誌慶(圖片由受訪者提供)

記:當初點解會對手作產生興趣?

Ling:我哋係漁民家庭出身,我係屬於八十後,因為家庭嘅關係,我哋同城市人嘅生活方式唔同,加上以前物資相對較少,好多嘢都要搵材料自製,包括生活用品同玩具,因此培養咗呢方面嘅技術同興趣。

於文創村三樓舉行工作坊(圖片由受訪者提供)

記:介紹一下你哋嘅產品同工作坊嘅特色?

Ling:我哋嘅包包大部份使用日本製布料,係專門去外地採購,我會以一針一線繡出特別嘅車線效果。可以配合客人挑選嘅布料,以及日常使用習慣,去訂製袋嘅樣式。亦有唔同嘅工作坊,有簡易嘅速成班,或者由逐個步驟去教嘅課程。仲可以三五知己約埋一齊整下手工,當係一種休閒娛樂活動,又可以帶走一件屬於自己嘅實用物品。

Yuki:拼豆產品主要係一啲流行嘅卡通公仔圖案,特別嘅係我會做一系列澳門世遺及節慶主題圖案,曾經出外參展,送贈外地朋友,推廣澳門文化。拼豆其實係普通嘅材料,網上都買到,但我哋推廣嘅係一種體驗,鼓勵大家投入心思同創意,為親朋好友製作獨一無二嘅禮物,亦可同家人朋友一齊製作,共度時光,創造共同嘅回憶。

Ling:其餘兩位姊妹,一位係以繡球花加上亞加力膠凝固,製成麗乾花飾物。另一位係以紙藝為主,製作立體紀念相簿、有機關嘅禮物盒等。

萬聖節主題工作坊(圖片由受訪者提供)

記:客戶係咩人居多?反應如何?

Ling:拼豆以小學生及中學生為主,家長帶埋小朋友嚟一齊砌。繡金包則以中學生、在職青年為主,亦有長者因為鍾意我哋嘅日式懷舊風而嚟參加工作坊。我嘅教學係由唔識學到識,試過有一個男仔嚟整包,送畀女朋友同埋阿妹,都幾有心思㗎。

繡金包

記:為何選擇文創村?認為文創村目前嘅營商環境如何?

Ling:以前係做網店,後來見到文創村嘅招商廣告,就過嚟睇下,覺得地方唔錯,逛得舒適,就決定進駐。進駐後先至開始了解何謂文創產業,亦都認識咗好多同行,可以互相交流支援。

麗乾花

記:目前有冇遇到經營嘅困難?

Ling:澳門地方不足,難以發展,喺工廈唔可以向客人展示產品,而家喺商場嘅租金唔低,單純用嚟做工作室係有啲貴,但做埋零售又未必有足夠嘅客流量。如果可以放寬限制,等我哋可以喺商場入面開辦正式嘅教學課程會更好,因為我哋始終想喺教學呢方面發展。

澳門主題拼豆飾物

記:店舖未來有咩計劃?

Ling:目前係畀幾年時間自己去試,不斷嘗試新產品,打造品牌。長遠而言,希望開設街舖,由幾個品牌或團體共同合作,前面係商舖售賣產品,後面有個閣樓做教室,舉辦各種工作坊。

Yuki:未來想統籌多啲手作活動,發起市集,推廣手作文化。

星座拼豆

記:最後,向讀者分享一句說話。

Ling:堅持信念,我哋呢間舖就係為咗夢想呢兩個字!

Yuki:相信自己,唔好放棄,試咗先,唔好後悔。

(訪後餘記:四姊妹能夠有共同愛好,而且一齊創業逐夢,實在難能可貴。然而,面對狹窄嘅本地市場,高額嘅經營成本,「飯田妹」要喺澳門嘅市場上長久立足,仍需堅持奮鬥一段時間,相信「姊妹同心,其利斷金」,冇捱唔過嘅難關嘅!)

飯田妹

https://fb.com/FT.handmake/

《邊樹「友」市集》第四回-萬聖節

邊樹「友」市集有詭(鬼)味?!

在10月28-29日入侵市集大攤小巷的黑影是甚麼?優悅沈鬱的音樂聲又從何傳來?詼諧詭異的魔術師帶來的是格林童話還是鬼聲怪魅??但傳聞找到黑影的真面目,制作出被封存的手作品,就能解開一切謎團。

市集的手作品被造型奇異的影子覆蓋,撕開影子的封條。出現的會是祝福?設計精巧的手作品?還是玩味十足、鬼魅奇趣的手工品?神秘的面紗由你來揭示!!

一眾玩味十足的手作人誠邀大家參與《邊樹友市集》第四回-萬聖節,一同探索這個神秘的手作樂園,感受手作中的創作玩味和奇趣體驗。

主辦:澳門手作及創意人協會

協辦:澳門文創村、零陸藝術學會、原味市集藝術有限公司、福氣氣球工作室

資助:澳門特區政府文化局

全力支持:邊樹文化藝術有限公司、飯田妹、忠叔工作室、Pepperland、Half Cat、Midnight、Blackcred、FORTITUDE、Deai Corner

日期:2017年10月28日及10月29日

時間:下午1時 – 晚上 9時

地點:澳門水坑尾街258街百老匯中心文創村3樓

檔主報名費:MOP300/2日

【檔主優惠】

*邊樹工作室會員會員可享半價報名優惠

*澳門手作及創意人協會會員可享半價報名優惠

【顧客市集當天優惠】

*於市集檔購物滿MOP100,可換印花一次,儲夠3個印花,可參與免費工作坊一次或小禮物一份,換完即止

*飯田妹:文創村二樓Z鋪。全店手作產品和工作坊可享九折

*福氣氣球工作室:文創村1樓M1舖。零售可享九五折優惠

*Deai Corner:文創村2樓2U鋪。「日本香薰字母蠟燭」工作坊限時9折優惠、全店日本直送首飾8.5折優惠

*Vintage Pepperland:文創村1樓J1,所有手作產品9折

*忠少工藝:文創村2樓YC2舖。零售產品9折

*Midnight:文創村2樓SA2舖。購物任何三對耳環9折

*FORTITUDE:文創村2樓D舖。全場85折

【報名方式】

* 歡迎所有手作/文創朋友參加*

報名表連結:https://goo.gl/forms/GPWx7yj00hocRhPa2

請先填好表格,如活動成功開辦, 工作人員會以電話聯絡,以進行繳費事項。

繳費方式:請親臨邊樹工作室繳費或把費用轉賬到「邊樹文化創意有限公司」中銀澳門幣戶口,賬號:23-01-10-177593 ,然後,把入數單據發送給本工作室電郵 binshustudio@gmail.com 確認,多謝合作。

發表迴響