【人物講嘢】張嘉敏(青年服務工作者)

今屆澳門立法會選舉曲終人散,多個以青年人為主嘅組別亦闖出新天,得到佳績。而在選戰當中,青年組織澳門中華新青年協會亦有參與其中,向澳門人展現出青年人參與社會的熱誠。今次廣野採訪到新青協副秘書長張嘉敏(Tiffany),請佢分享喺青年組織嘅工作經歷、對澳門年青人現狀嘅觀察以及解答坊間對佢哋嘅一啲疑問。

記:阿賢 張:張嘉敏

記:可否介紹一下目前喺新青協嘅工作?

張:我目前係新青協嘅副秘書長,主要負責社會參與範疇,關於時事、民生、社會議題、政策等嘅工作,傾聽年青人嘅聲音,架設發聲嘅平台,將佢哋嘅想法告知政府,具體主要為舉辦論壇、藉助媒體發表意見等。

Tiffany於天鴿風災期間擔任物資調配協調工作(圖片由受訪者提供)年

記:你係幾時開始同新青協結緣?

張:零七年我就開始認識新青協,當時我讀高二,參與咗新青協嘅品牌活動「健康大使」培訓計劃。其後做咗幾年義工,大學畢業時就加入新青協做全職人員。我大學本科讀公共行政,所以一入嚟就能夠學以致用,我係由一個活動參加者轉變為一個服務者。

Tiffany於義務活動中向長者細話家常(圖片由受訪者提供)

記:天鴿風災時,新青協組織義工隊幫助社區,你喺當中負責邊部份嘅工作,從中有咩體會?

張:風災係我幾年社團生涯中最驚險嘅體驗,今次天鴿我哋係第一批走出嚟組織義工嘅團體,而且能夠彈性、及時咁處理善後工作。我初期喺前線工作,後來退居後方,後勤工作並非比前線更容易。當時我一個人要同時睇實二十個義工群組嘅動態,當中差不多有幾千人,要時刻整理訊息,確認真偽,又要不斷喺群組中公佈救災資訊、調動資源,雙眼唔能夠離開屏幕超過一秒,否則訊息會多到唔知去到邊。一旦人力物資延誤或錯配,幫唔到有需要嘅人,會覺得好內疚,因為大家係信任我哋個組織先加入群組,而我嘅協調仲未做得夠好。之後都諗返,如果政府能夠有統一信息協調中心,一定會做得比我哋好,可惜澳門至今仲未有呢樣嘢。

Tiffany於義務活動中向長者細話家常(圖片由受訪者提供)

記:參與青年組織工作帶畀你咩滿足感?

張:我唔只當呢份係工,服務青年對我而言已經係一份事業,我好多同事都係咁,唔只係朝九晚五咁返工,而係24小時預備,那怕放緊大假,只要有需要,我哋都會去工作。無論去到咩年紀,服務年青人都會令我哋嘅心態變得年青。而且我作為生涯規劃師,令年青人選擇到適合自己嘅道路,事後佢哋向我道謝,或者鼓勵年青人講出意見,令佢哋得到成長,呢啲時刻都會好有滿足感。

記:十年嘅新青協生涯有咩難忘時刻?

張:風災中見到有同事企上垃圾車幫手,係一個幾難忘嘅時刻。因為大家都知道自己服務緊社會,只要有需要,都會義不容辭去幫手。而且風災中見到有好多年青人出嚟幫手,見到佢哋有成長,都係一件幾難忘嘅事。

新青協舉辦2017青年就業博覽會,工作人員與梁維特司長合照(圖片由受訪者提供)

記:以你所見所聞,目前澳門年青人面對緊咩難題?

張:每個階段面對嘅難關都唔一樣。對於升學嘅年青人而言,佢哋對自己嘅前路仲未有好清晰嘅方向,需要一段時間摸索,呢個過程正正係我哋青年社團存在嘅理由。政府雖然放咗好多資源,但要點樣先可以令資源到位?正正係我哋需要做好協調者嘅角色。而社會新鮮人又要面對工作壓力、向上流動、置業、成家立室等等問題,並且喺初出社會嘅五至十年內一一碰上,佢哋要承受外界好高嘅期望。而呢啲問題唔只係我哋提供服務就可以解決,而係需要政府、社會嘅種種措施政策配合,因此我哋近年會鼓勵年青人議政論事,咁政府先能夠更好去協助佢哋。

記:你覺得政府可以點樣協助年青人?

張:可以做多啲細緻嘅幫助,例如外地升學嘅年青人,佢哋需要更及時嘅協助,例如醫療上嘅協助,政府可以同當地嘅組織及學校協調。其實目前不乏好嘅政策,但如何執行政策先係關鍵。

Tiffany代表新青協出席電視台時事節目(圖片由受訪者提供)

記:外界認為新青協係「建制」組織,對此你哋有咩回應?

張:主要係因為我哋受政府資助,我哋經常同政府溝通,所以有人就認為我哋同政府企喺同一陣線,係「保皇」,但我喺工作中所見到嘅並非如此。似乎大家對於「建制」呢個詞嘅理解有啲偏頗,「建制」不等於「保皇」。我哋同政府有效溝通,從而做好社會服務並且交流意見,係有建設嘅相互關係,而且我哋係企喺我哋服務嘅對象——市民嘅一方去同政府溝通,而市民亦並非一定同政府對立,因為政府嘅存在本來就係要服務市民。社會近年好鍾意用標籤去判定一啲人,非黑即白、非我即敵,然後大家就唔再深入了解,咁樣係咪真係好事?我成日同年青人講,如果你想知道新青協係個點樣嘅社團,參加我哋嘅活動,加入我哋,親身感受下,我相信澳門嘅年青人都懂得理性判斷,唔會「盲撐」或「盲反」。以我咁多年嘅經驗,我覺得新青協嘅成員都係做實事、有熱誠、真心為澳門嘅青年人。

與青年朋友在偉龍馬路地段考察未來公屋項目(圖片由受訪者提供)

記:今年你哋新青協嘅張志雄醫生同公民監察林玉鳳教授聯合參選立法會,如今林小姐當選,你哋會有咩跟進工作?

張:新青協張志雄醫生作為公民監察第二候選人,協助林議員競選,而家林議員將要進入議會,接下來我哋新青協嘅工作就同廣大市民一樣,就係向林議員「追數」啦。作為林議員嘅支持者,並唔係選舉結束就完成任務,接下來四年,我哋會成為監督者,希望林議員能夠依約「找數」,落實政綱,將年青人嘅聲音帶入議會。

與青年朋友在偉龍馬路地段考察未來公屋項目(圖片由受訪者提供)

記:對於風災後澳門社會嘅狀況有咩睇法?

張:澳門社會近年來經濟發展迅速,大家嘅生活基本穩定,而對社會嘅不滿反而越來越多,因為大家喺滿足基本需要後,自然會有更多追求,咁係好正常嘅。政府以後嘅施政唔單只要追求「量」,更要追求「質」,多啲關注市民生活質素,民生嘅工作要跟得上經濟數字。我有信心會做到,因為從今次風災睇得出,大家都意識到要將想法訴求講畀政府聽之後,仲要落實執行,有咁嘅想法,已經係好嘅開始。

記:最後,有咩想同讀者講?

張:希望社會更多關注我哋青年服務者所做過嘅工作。

(訪後餘記:值得一提嘅係,Tiffany由於具有幹練嘅工作能力,因此同事間又會稱佢為「女王」,採訪期間,談吐淡定得體。結束訪問時,已將近晚上七時,然而一眾協會同事仍然勤懇工作。新青協近年,尤其在風災當中嘅工作,社會有目共睹,外界或者可以多作了解,再作評論不遲。)

薪Think

https://fb.com/SomeNewThink/

澳門中華新青年協會

https://fb.com/MNCYA/

記者/阿賢

攝影/Isaac

「希望社會更多關注我哋青年服務者所做過嘅工作。」

發表迴響