【人物講嘢】周家裕(澳門大學合球隊隊長)

合球運動喺本地較鮮為人知,呢項運動起源於荷蘭,同籃球有啲相似,都係兩個半場對攻,需要透過投籃得分,但分別係唔能夠運球,只能夠傳球,面對對手攔截亦唔可以強行出手投籃,仲有一點就係要男女混合作賽,可謂一項講求溝通協作嘅運動。而澳門大學係最早將合球引入本地並成立正式球隊,歷史只有十幾年,屬於新興運動。今次廣野訪問到就讀澳大七年、目前正攻讀碩士嘅澳大合球隊隊長周家裕,分享佢多年打合球嘅經歷。

記:阿賢 周:周家裕

記:你目前喺澳門大學合球隊中擔當緊咩角色?

周:而家係第三次出任澳大合球隊隊長。我喺場上主要負責進攻,其次係助攻隊友。

合球起源於荷蘭,同籃球相似,兩個半場對攻,需要透過投籃得分

記:可否簡介一下澳大合球隊?

周:最初由澳大嘅一班老師由台灣引入合球運動,開始時係由一班志同道嘅朋友組成合球會,然後再招生,後來組成球隊,而我嘅師兄係澳大合球隊嘅第一批成員。

記:你係點樣開始接觸合球呢項運動?

周:好多人都係喺讀澳大先開始玩合球,而我比較特別,讀高三時有一次澳大喺我哋學校舉辦暑期興趣班,我參加咗,而且打咗兩個星期合球,有前輩同我講以後不如放咗學過嚟澳大一齊打。後來我考入咗澳大,於是就加入合球隊至今。

澳大合球隊可謂澳門合球運動嘅始袓(圖片由受訪者提供)

記:打合球對你有何得著?又畀到你咩樂趣?

周:中學時打籃球,因為身材比較瘦削,慢慢跟唔到上去,參與合球運動後,因為合球身體接觸較少,着重速度同節奏,而且係男女混合作賽,女仔節奏可能會慢啲,因此練習時要溝通多啲,男隊員要了解女隊員嘅各種狀況,並且協調雙方步伐先能夠合作無間。

澳大合球隊成員(圖片由受訪者提供)

記:合球嘅練習比較着重邊方面?

周:我哋以往較着重於技術上嘅訓練,而家我哋會更注重體能,主要以心肺、急煞等為主,因為好多時我哋比賽下半場就已經冇體力。

記:招收隊員情況如何?

周:我哋喺大學體育周、合球會招隊員,而且雙方亦會合作做推廣。而家我哋有球員會去中小學教合球,以後升上大學都能夠有一定基礎。

家裕喺場上主要負責進攻,其次係助攻隊友(圖片由受訪者提供)

記:喺澳大合球隊有咩難忘嘅賽事?

周:香港每年舉辦嘅會長盃合球邀請賽,澳門大學隊參與大專組別比賽,由於香港合球歷史較耐,我哋一直都輸畀佢哋,難得上一年我哋首次戰勝到香港大專聯隊,我哋打咗七年先贏到佢哋。

早前曾經自費去荷蘭參與社區賽事,回澳後大家對合球嘅概念都唔同咗,聽從當地教練嘅建議,改革咗戰術打法,加強咗自身嘅走動,結果終於能夠戰勝香港大專聯隊。

合球賽事(圖片由受訪者提供)

記:之後你哋會有咩目標?

周:我哋將會參加全國大學生合球賽,會對上天津科技大學等嘅強敵。

記:合球運動喺澳門嘅狀況如何?

周:澳門有個合球聯賽,由唔同體育會互相作賽,但其實當中嘅球員主要都係由澳大出來,再加上一啲新成員。除此之外,我哋希望可以發展到另外一隊本地大學隊,係可以同澳大作賽嘅。所以我哋已經喺幾所中小學校開設興趣班,希望學生升大學後能夠組成合球隊。

澳大合球隊出戰香港合球邀請賽勇奪冠軍(圖片由受訪者提供).jpg
合球着重速度同節奏

記:最後,有咩想同讀者講?

周:讀緊書嘅學生如果有想做嘅事,不妨搏一鋪,唔好怕失敗,最重要既係盡力過。

(訪後餘記:周家裕目前一邊工作、一邊讀書,仲要參與合球隊,征戰多年,對合球嘅熱情依然無減,能夠有一樣長久堅持嘅愛好,確實係非常難得。)

記者/阿賢

攝影/Isaac

「讀緊書嘅學生如果有想做嘅事,不妨搏一鋪,唔好怕失敗,最重要既係盡力過。」

發表迴響