【廣旅日記】東京拉麵店推薦!印象深刻的拉麵合輯

拉麵食得多,感覺款款差唔多,有冇特別啲嘅拉麵呀?小編今次就總結咗七款喺東京印象最深刻嘅拉麵。

[新宿區]茄味澎湃蝦鮮洶湧嘅番茄拉麵--五ノ神製作所

超濃郁湯底沾滿麵身,一入口就畀蝦膏洶湧嘅甘香侵佔,番茄嘅酸甜味正好中和蝦膏嘅醇厚,食落香濃又唔膩!溏心蛋好入味,漿糊狀嘅蛋黃香醇誘人。碗中嘅牛肉口感鮮嫩,令人難忘。

PS:鮮紅嘅番茄湯汁如果滴落件衫度真是好礙眼又唔易洗!店家提供一次性「口水肩」畀顧客取用,好貼心!

らーめん 五ノ神製作所

地址:東京都新宿區百人町1-23-22

營業時間: 11:00~15:00、17:00~21:00

參考價格:1,180円

[新宿區]大件夾抵食嘅大碗元祖蘸面--大勝軒

蘸面之父山岸一雄傳承下來嘅正宗蘸面!麵條彈牙,湯汁濃郁獨特,而且份量十足,食量小嘅人根本食唔曬一個麵!

大勝軒

地址:東京都新宿區新宿3-23-12

營業時間: 10:00~23:00

參考價格:700円

[台東區]來自北海道嘅牛油醇香--味之時計台

北海道天氣寒冷,為了增加熱量禦寒,會喺已經加了豬油嘅拉麵湯底上,再加一整塊香噴噴嘅牛油。超大粒嘅肥美扇貝、入味嘅叉燒、清爽嘅豆芽同粟米粒,喺寒冷嘅冬季,食完麵,再飲埋呢碗香濃醇厚嘅熱湯,暖暖嘅幸福!

另一碗係只售900円,又平又好食嘅熟成醬油拉麵,味道濃郁厚重。

PS:時計台係札幌著名標誌,味之時計台係1974年喺札幌創業嘅老店,個名有著「要成為拉麵界標誌」嘅意義。喺北海道嘅拉麵界赫赫有名,簡直是「北海道拉麵」嘅代表。

味之時計台

地址:東京都台東區上野6丁目13-7

營業時間:周一至周六 11:00~03:00、周日及國定假期 11:00~23:00

參考價格:1,600円

[台東區]每一口都爽爽脆脆嘅醬油拉麵--喜多方食堂

喜多方市係醬油拉麵嘅發源地,醬油湯底色淡且味道清雅,食多唔怕滯。手打嘅「多加水面」係店家特色,口感超Q彈。蔥嘅香味滲入湯中,加上煮到軟腍腍嘅肥美豬背脂,實在係大滿足!

PS:喜多方嘅拉麵其實係從中國傳來。昭和初期,從中國來嘅人挑著擔子喺喜多方市賣拉麵,呢個就係日本拉麵嘅始祖。

喜多方食堂

地址:東京都台東區元淺草4-7-15

營業時間:07:30~17:00

參考價格:650円

[中央區]一個套餐三種食法,拉麵+鯛飯組合 --銀笹拉麵  

推薦鹽味湯底,先將海苔放入湯攪拌,等海苔嘅味道滲入湯中,然後食拉麵,等麵差唔多食完時,就可以將湯倒入飯碗,同鯛魚飯均勻攪拌,變成美味嘅湯泡飯。


PS:等位嘅時候還可以睇下門口嘅拉麵+鯛飯食用教程。

銀笹拉麵

地址:東京都中央區銀座8-15-2

營業時間:周一至周六 11:30~15:00、周日及國定假期 17:30~(賣完即止)

參考價格:850円(麵)+200円(飯)

[千代田區]東京超人氣蘸面--六厘舍

粗麵嘅口感好好,滑滑地彈力十足!湯底係由豬骨、雞肉同其他肉類煮成,仲加入咗叉燒碎同魚粉,令湯質變得非常濃稠,易於粘上麵身,唔駛飲湯都可以品嘗出湯底嘅濃郁鮮味。

六厘舍

地址:東京都千代田區丸の内1-9-1

營業時間:周一至周六 07:00~09:45、周日及國定假期 10:30~23:00

參考價格:830円

[連鎖店]套餐超抵食! --橫濱家系

24小時營業嘅宵夜好去處。湯底肉香四溢,但麵嘅口感一般,叉燒煮得軟爛入味。因為啖湯太誘人,忍唔住飲咗好多,但過後完全唔會口渴。套餐包含煎餃同牛丼,超豐盛!

炸雞炒飯都好好味!炸雞皮又薄又脆,肉汁入味又唔會太鹹!

橫濱家系

地址:新宿区西新宿1-15-1桜木ビル二階

營業時間: 24小時

圖、文/丸子

發表迴響