近年來，澳門有越來越多年輕嘅自由工作者，憑住一技之長，做更多不同種類嘅嘗試，樂於走出澳門，增廣見聞，擴闊視野，增加各種工作經驗。今日廣野採訪到大專畢業咗一年、目前為自由工作者嘅室內設計師謝嘉怡（Bel），同大家分享佢對工作同生活嘅新想法。
記：阿賢 Bel：謝嘉怡
記：你係點樣開始從事設計工作嘅呢？
Bel：以前上網見到外國嘅室內設計同建築都好靚，自己又會好鍾意玩嗰啲擺放傢俬嘅小遊戲，於是就入讀澳門理工學院綜合設計，平面設計同室內設計都有學到，並且一邊讀書一邊做相關嘅兼職。
記：畢業後有冇搵到相關嘅工作？
Bel：我目前係自由職業者，以兼職及單次工作項目為主。因為如果做全職嘅話，時間受限制，而家有好多畢業生都暫時唔搵全職，想去玩吓先，趁住後生睇多啲嘢。而且本地做全職室內設計，人工較其他職業低，人哋做賭場、售貨員，人工仲高，可能有人會話你讀咁耐都係搵得咁少，心理會有少少唔平衡。我希望一邊做兼職，儲少少錢，然後就去其他地方旅遊。
記：你去過咩地方旅行？旅行帶畀你咩嘢體會？
Bel：去過西班牙、土耳其、西藏、新疆等地方。旅途中會欣賞當地一啲好嘅空間設計，例如每去一個地方，都會特登去搵當地嘅Café、特色建築參考。西班牙有位著名嘅建築師高迪，我會特登去搵佢嘅設計，西班牙巴塞羅那有一間起咗上百年嘅教堂聖家堂，我非常鍾意，亦係高迪嘅代表作，當中精細嘅技巧，而家嘅人都未必能夠達到。我亦會專門選擇住喺當地嘅民宿，感受當地嘅文化。之前都有人問過我有冇興趣做關於旅行嘅合作計劃。
記：目前會接啲咩設計工作？
Bel：主要係家居室內設計工作，同時喺生產力暨科技轉移中心教中學生畫漫畫，亦會負責婚禮等活動場地設計。
記：對於喺澳門做室內設計有咩體會？
Bel：本地客戶通常都以實用要求為主，想要善用細小嘅空間，例如整地台，用嚟儲物，唔似其他地方咁，有高嘅樓底、大嘅空間去發揮。澳門對於室內設計仍然好拘謹，轉來轉去都跳唔出定式，一見到新嘅設計就話未做過，覺得唔得。其實外國有好多好玩嘅風格，例如整一啲吊床、主題之類，但澳門好多人都接受唔到創新。
我本身諗住做設計可以周圍去吓，可以好好玩同多元化，但其實喺澳門做室內設計同做文員冇咩分別，都係返去辦公室畫圖多，而且制肘唔少，同想像中有啲唔一樣。
我有啲同學都好勁，但最尾都係入咗賭場做設計，做嘅工作亦係無法完全發揮佢嘅才能。所以我覺得澳門有啲埋沒人才。
記：你自己有咩設計作品係比較滿意嘅？
Bel：之前有一個澳門大學舊址空間改造活動中，我做過一個方案，係將舊址設計成一間太空、星空主題嘅餐廳。
記：你以後會有咩打算？
Bel：而家暫時都係想一路做設計，一路去旅行，擴闊自己眼界，感受唔同嘅文化。如果可以將自己嘅旅遊愛好，融合設計同繪畫，轉變成一個職業，當然係最理想嘅。
記：有咩嘢想同讀者講？
Bel：年輕人應該重視自己嘅想法，做自己想做嘅事，多作各種嘗試。
（訪後餘記：Bel對於美有自己嘅一套想法，喜歡設計、攝影、畫畫、旅行，身兼多職，可謂多才多藝，雖然澳門目前嘅環境令佢有一啲迷茫，但經過摸索後，相信佢會搵到適合自己嘅路。）
Instagram: belbeldeer
記者／阿賢
攝影／Isaac
鳴謝／Common Room Macau
