【人物講嘢】李德恩(運動用品創業者)

近年來,越來越多人討論青年創業,政府亦推出多項青年創業配套,鼓勵年輕人開展自己嘅事業。今期廣野邀請到從事運動服訂制銷售嘅青年阿德,分享一下佢嘅創業心得。

記:阿賢
阿德:李德恩

記:可否簡單介紹一下你嘅業務?

阿德:我哋會做運動服裝嘅訂制、團體運動制服嘅訂購等。

Legacy的客製化球衣

記:你係幾時開始做呢類生意嘅呢?

阿德:我喺三、四年前已經開始經營,一年前就開始做Legacy嘅運動服代理及訂制設計。

記:點解會有興趣投身做呢類生意?

阿德:喺學生時代已經對運動方面有興趣,當時學校又會畀機會我哋做校運會嘅班服,出到嚟做嘢後,我就繼續做運動用品嘅銷售,不時會有人問我,可唔可以幫手做埋波衫之類,於是我就覺得訂制運動服喺澳門有開拓嘅空間,繼而主動去搵一啲廠家,做運動服代理業務。

為其他團體製作隊服

記:點解會選擇代理Legacy?你哋訂制設計運動服嘅優勢喺邊?

阿德:之所以會揀Legacy去代理,係因為目前廠方對於我哋嘅支援充足,同埋佢本身嘅技術亦成熟,基本上任何效果嘅隊服設計都做到出來,因此我好鼓勵顧客可以表達自己天馬行空嘅想法,我哋會盡量配合,滿足要求,而且會即日出圖畀客戶。

Legacy的客製化球衣

記:你哋會點樣幫助顧客設計球衣?

阿德:我哋喺內地嘅廠有專業設計部門,可以按照客人要求畫出圖樣,並依據佢哋嘅預算,畀佢哋選用相應嘅衣服材料。

 

記:你而家通常點樣聯繫同服務客人?

阿德:通常我哋都係會用社交網站聯絡,設立平台宣傳,招徠客戶。目前我哋主力網上平台,未考慮設立門市,選擇將資金投放喺產品上,並且使產品能夠以更為低廉嘅價格銷售畀客人。球衣做好咗,我哋甚至會直接送去客戶手上,盡量方便客人。

這件球衣是阿德覺得較為滿意的設計

記:你哋目前同邊類團體組織合作較多?

阿德:客戶來自各個學校,或者一啲籃球訓練營,本地警察、消防等籃球隊。

客戶穿著Legacy的球衣

記:你目前有邊幾位合作伙伴?

阿德:目前澳門呢邊由我負責聯絡客戶、分貨之類,而Legacy喺幾個地區,香港、台灣、澳門都有分部,甚至有外國嘅籃球隊都會搵我哋做衫,主要廠方、設計部門同生產團隊都喺內地。當初我都係透過社交媒體接觸佢哋,之後大家約見,覺得有心做呢件事,於是就一齊合作。

中學球隊透過阿德製作隊服

記:你覺得澳門目前體育用品嘅經營環境如何?

阿德:經營環境大致上都係好嘅。

 

記:創業期間有咩難忘經歷?

阿德:有時啲客要喺好短時間內攞到貨,因為貨運問題,我要一日之內來回港澳提貨畀客人,好彩都趕得切。

中學球隊透過阿德製作隊服

記:澳門最近提倡智慧型城市嘅概念,你覺得點樣?

阿德:物流方面嘅提升,對我哋呢類業務肯定係有利嘅。

 

記:你有咩想同廣野讀者講?

阿德:要令勤奮成為你嘅習慣。

「要令勤奮成為你嘅習慣。」

(訪後餘記:喺目前網絡平台嘅大環境下,把握機會,搵到好嘅產品,提供畀 有需要嘅客戶,先可以喺銷售生意上有一席位。踏實而盡責嘅服務態度,亦係加分點。阿德能夠同本地唔少學校、球隊合作,想必喺呢一方面亦有佢過人之處。)

Legacy Macau Sportwear Company

https://fb.com/legacymacau/

記者/阿賢

攝影/Isaac

發表迴響