【人物講嘢】Ar B 鄭少華(歌手)

喺澳門嘅演藝圈中,一位全職歌手要經常有音樂演出,並唔係容易嘅事。酒吧駐唱歌手Ar B 鄭少華,幾乎每晚都有固定演出,仲要唱足幾個鐘,歌唱實力不容置疑。然而,作為一個音樂人,又係咪甘心只留喺酒吧嘅小小舞台?今期就有請Ar B,同大家分享一下酒吧駐唱歌手嘅職業生涯。

記:Ar B最近有咩活動?

B:最近同一啲Youtuber合作,拍攝網上節目,亦有同其他歌手合作,幫佢哋和音、填詞,同時都創作緊歌曲,籌備自己嘅CD,夜晚就繼續喺酒吧擔任駐場歌手。

擔任酒吧駐唱,歌曲需要滿足客人口味

記:據聞你有泰國血統?可否講下你嘅身世?

B:我媽媽係泰國人,以前嚟澳門工作,識到爸爸,咁就落地生根,我係喺澳門出世同長大嘅。細過冇特別學泰文,近年開始接受泰國文化,會聽泰國音樂,間中仲會跟媽媽返泰國,放鬆一下,接觸大自然,泰國嘅生活節奏冇澳門咁急促,都激發到唔少創作靈感。

記:當初點解會鍾意音樂?點解想做歌手?

B:父母鍾意聽歌,耳濡目染下,自小開始學彈琴,之後想再有型啲,咁就學結他夾band。見到舞台上嘅明星,就令到我自己都想成為一顆星。

婚宴演出

記:你係點樣踏足演藝圈?

B:鍾意唱歌,唱唱下就有比拼嘅心,想不停挑戰難度,就參加比賽,開頭都未攞到成績。後來就決定去台灣學唱歌,學咗半年,一星期三堂,老師指引啓發,再由自己去領悟。學成返嚟再參加比賽,終於有啲成績。返嚟後,都打過其他工,但個心都係想從事演藝工作,咁就自己接一啲演出,後來認識到一個歌手朋友,介紹我嚟酒吧做兼職駐場歌手,後來公司覺得我合適,就正式簽約做藝人。

記:做咗全職歌手都有一段時間,滿意成績嗎?

B:三年有多,未算滿意,而家我盡可能參與各種演出,包括音樂劇、綜藝節目、司儀、MV拍攝等等,我認為每次演出都係一個企上舞台嘅機會,可以面對觀眾,發光發亮,影響他人。每年會為自己定下目標,藉此鞭策自己,抗衡惰性。嚟緊會再去學聲樂,編好手上已經寫好嘅歌,未來計劃會去台灣、香港巡迴演出。

Ar B擅長Keyboard及結他自彈自唱

記:點睇澳門歌手嘅發展現況?

B:而家除咗簽公司,亦有唔少音樂人選擇獨立經營,唔駛受制於公司,可能做得更自由,更開心。澳門要做歌手好容易,只要派咗一首歌,就係澳門歌手,過幾年再派一首歌,都仲係歌手,不過唔會有人當你係明星。反觀香港,要爭崩頭先等到有公司畀機會你派歌,而且一唔掂就好快被淘汰,澳門嘅好處係門檻低,但壞處係唔夠商業,歌手嘅定義唔清。有啲藝人為咗賺點擊率,要翻唱人地嘅舊歌,或者拍惡搞片,好似有啲無可奈何,但做藝人就係為咗曝光,要放低身段,娛樂大眾,要畀觀眾見到先有存在價值。

錄音

記:認為澳門嘅藝人應該要做啲咩?面對緊咩困難?

B:可以多啲嘗試向外合作,crossover不同領域,唔一定係個人走出出,亦可以係帶啲嘢返嚟,例如一啲大型嘅項目。而家澳門機會多咗,音樂頒奬禮都有幾個,但普遍澳門音樂人嘅進取心仍未夠,少咗啲競爭動力。澳門嘅演藝人才唔少,台前表演嘅人多,但係行政、營銷嘅人才唔夠,藝人得唔到公司嘅支援同配合,好多時都係要自己推自己,其實會阻礙事業嘅發展。

記:最後,有咩說話想同讀者講?

B:堅持好緊要,放棄好容易,成功路從不擠擁,因為堅持嘅人唔多。

Ar B認為每次演出都係一個機會,可以面對觀眾,發光發亮,影響他人。

(訪後餘記:喺澳門嘅演藝圈生存,總會有一種無力感,時不時都會仰望外邊更大嘅舞台,希望能夠去到更遠嘅地方發光發亮。Ar B雖已成為全職歌手,演出頻繁,看似達成咗好多人心中嘅理想,但仍然要面對未來發展嘅困惑。正如佢所講,堅持好緊要,放棄好容易,能夠撐到最後,先有成功嘅機會。)

Ar B少華

https://www.facebook.com/arbmacau/

記者/Isaac

「成功路從不擠擁,因為堅持嘅人唔多。」

發表迴響