【人物講嘢】梁琦惠(高級服裝採購主任)

嚟自香港嘅百貨公司服裝採購主任梁琦惠,從事時裝行業多年,周遊世界各國,如今移居澳門,開展一段人生新歷程,未知過慣咗香港快速節奏嘅佢,對澳門生活又有啲咩體會?今期廣野小記喺因緣際會下,訪問到Joanna,聽佢分享一下服裝採購嘅工作以及喺澳門嘅生活。

記:Isaac J:梁琦惠 Joanna

記:可否介紹一下百貨公司採購主任要負責嘅工作?

J:採購主任係要負責一連串與時裝相關嘅服務,制定公司嘅服裝訂購策略,包括唔同品牌產品嘅款式、數量、顏色、尺寸等,要安排銷售人員調動、店舖管理以及貨品陳列,分析客戶嘅反應同埋銷售情況,與品牌公司互相溝通協調。同時要配合市場部嘅工作,合力推出服裝品牌嘅宣傳策略,最終目標就係要吸引客人消費。

採購主任係要負責一連串與時裝相關嘅服務,制定公司嘅服裝訂購策略

記:點解會加入時裝行業?

J:同我嘅家庭環境都有關係,因為我媽咪係做服裝行業,令我自小就培養咗呢方面興趣,都因此思考呢個發展方向。大學嗰時,先係讀國際商業管理,跟住去咗大型港資公司做服裝採購,之後先再入讀理工嘅服裝管理,然後再去英國、意大利進修。學識咗由設計件衫、到揀布料、生產、銷售嘅過程。出國讀書認識到好多人,大家互相交流,會了解到唔同國家嘅服裝市場有咩特別,知道世界各地唔同人嘅需要。

Joanna的國畫作品

記:分享一下時裝採購嘅工作經歷?

J:好多人以為時裝買手就係不停飛去睇Fashion show,以為好優雅咁,實際唔係想像中咁悠閒,去之前要提前做準備,要先睇定一啲心水,計埋採購預算。通常由Fashion show到正式投產再到銷售係有一年時間,期間要做大量資料搜集,了解外在環境以及客戶群消費模式,預測未來嘅市場動向,先至可以決定要點樣幫公司入貨。

而買手通常按不同風格嘅品牌分工,我係比較熟悉男裝品牌,有買手係熟悉女裝,亦有人以產品作為強項,例如牛仔褲、皮具、配飾等等。

Joanna的國畫作品

記:你喺香港長大,生活過一段時間,點解會選擇過嚟澳門生活?

J:早前因為工作關係都嚟過唔少,大約年半前,澳門嘅大型百貨公司需要服裝管理專才,我想增廣閱歷,豐富一下自己嘅工作履歷同經驗,所以就由香港移居嚟澳門。我認為澳門好適合居住同生活,節奏較平穩,壓力少,環境舒適,我都好快就適應到。

Joanna的禪繞畫作品

記:近年嘅服裝業市況如何?

J:以前每個客人嘅消費額較高,近年的確有所回落,而家以銷售中價貨品為主,所以我哋都會同銷售嘅同事講要積極啲,做好服務,吸引更多客人。

Joanna的禪繞畫作品

記:分享一下你對水墨畫、書法嘅心得?點解會有呢啲興趣?

J:記得以前去英國深造,第一次參觀大英博物館,發現入面好多藏品都唔係英國嘅,好多都係喺世界各地侵略強搶返嚟嘅,有中國、埃及、希臘等等,我覺得好震撼心靈,因而喚醒咗我嘅國家意識,好想去深入了解中華文化,去傳承自己國家嘅傳統文化。畫畫同書法訓練到我嘅專注力,因為要一筆筆咁去畫,要好有耐性,唔可以急,過程亦可以減壓。未來希望可以喺五十歲前開一個書畫展。

我自己對敦煌壁畫好有興趣,特別去研究佢哋嘅服飾,由古人嘅服飾可以觀察到當時嘅文化、經濟、社會等等資訊,例如髪簪可以反映出佢哋對頭髪嘅重視、三千年前嘅眉筆可以反映出古時女子已經會化妝,所以服裝唔只係服裝,係文化嘅表現,嚟緊都會帶一啲年青人去敦煌做導賞。

於展覽中導賞漢朝衣飾
於敦煌文物展覽中擔任導賞員

記:最後,向讀者分享一句說話,勉勵青年。

J:「行到水窮處,坐看雲起時。」因為人生有好多事都控制唔到,面對逆境時要調整自己嘅心態,放鬆情緒,雖然好難達到呢種境界,但只有盡力去做,順其自然。

(訪後餘記:所謂「人靠衣裝」、衣食住行中衣係排第一,服裝可以話係人類最「貼身」嘅文化,身為服裝採購主任嘅Joanna打扮時尚,但可以由潮流服飾講到去古代薄衣,由澳門講到倫敦再去到敦煌,足見其知識廣泛,融匯古今,可謂令人刮目相看!)

記者/Isaac

「行到水窮處,坐看雲起時。」

發表迴響