【人物講嘢】梁子堅(Wings for Life World Run – App Run 澳門區策劃人)

你有冇諗過,如果要你參加一場冇終點嘅跑步比賽,你會跑幾耐?發令槍一響,你就要一直跑落去,冇終點衝線嘅激勵,的確考驗參賽者嘅意志同毅力。5月7日晚,喺氹仔海濱休憩區嘅跑步徑,就舉辦咗一場咁特別嘅比賽。活動嘅用意更加特別,係為唔可以跑步嘅脊椎傷患而跑。我哋就請來Wings for Life World Run – App Run 澳門區策劃人、Red Bull澳門區銷售及市場經理梁子堅(Ken)介紹一下個活動。

活動開始前,選手在氹仔海濱休憩區熱身

記:今次嘅活動同一般跑步賽事有咩唔同?

Ken:今次嘅活動係Red Bull舉辦嘅Wings for Life World Run,係一個全球性嘅籌款活動。我哋有超過36個國家參加呢個活動,全球同一時間,澳門時間就係七點,一齊開跑嘅。呢個活動最主要係幫脊椎受損嘅傷殘者籌款。好多病人係因為車禍等等原因,整親條腰,即係脊椎,但係脊椎受損一直冇醫治方法,所以我哋特登搞咗呢個活動為呢班人籌款。

用來計算成績的app

記:呢個比賽仲有咩特別嘅地方?

Ken:大家要下載一個Wings for Life嘅app,模擬計算自己嘅成績。七點鐘開跑之後,個app就用GPS計算你跑咗幾遠。過咗三十分鐘之後,喺起點度有架虛擬車,開始沿參加者跑出嘅長度,追返參加者。虛擬車一開頭用每小時10公里嘅速度去追,跟住每10分鐘加速1公里,11、12、13咁樣去追,直至追返我哋個參加者,比賽就完啦。不過喺其他地方,有條件嘅話就會安排一架真嘅私家車或者巴士,由車去追跑手。所以我哋會叫呢個活動做冇終點嘅比賽,只要夠力夠快,跑幾遠都得,同時亦可以為慈善出一分力。

賽事中的選手

記:呢個活動搞咗幾耐?今年有幾多人參加?

Ken:今年係呢個活動嘅第四年,亦係澳門第一次參加。今次澳門有大概五十個參賽者,我哋推廣嘅時間比較短,得三個禮拜,但係反應都好好,開賽前都有人即刻來報名。亦有澳門嘅跑手專登飛去台灣。我哋嘅活動唔收費,捐錢係自願,今年籌到五千蚊,大家有錢出錢,有力出力。今次係好嘅開始,第一,可以令到大家知道跑步可以幫到人。我哋有個口號,叫幫跑唔到嘅人跑埋佢哋果份,同埋我哋嘅競賽元素比較少,志在大家去參與、一齊玩。

賽事中的選手

記:我都留意有跑團成員嚟幫手。

Ken:我哋今次搵咗四個組織幫我哋舉辦呢個活動。除咗Red Bull之外,我哋有JK FITBOX積極健身會,佢哋係澳門區嘅協辦。仲有Runplus路跑家,佢哋有成員參賽,亦有提供工作人員、水站。台南今年有6000人參加希望下年澳門嘅規模更加大,甚至港澳區可以有架真車,唔再需要用手機app虛擬架車。

賽事中的選手

記:Wings for Life呢個跑步活動最好嘅記錄係幾多?

Ken:舊年亞洲區嘅冠軍係一位日本女士,佢喺台灣參賽,成績係66公里,大概係一個半馬拉松,跑到凌晨一點幾。唔計今屆,世界紀錄係前年喺西班牙嘅一位男士,跑出88公里,成兩個馬拉松有多,係好犀利嘅一件事。冇終點,keep住跑,架車追佢唔到,比賽就會繼續去囉。

比賽進行時,有工作人員為選手提供水,並為他們加油打氣

(訪後餘記:Wings for Life七點鐘開跑,跑到差唔多九點半先結束。成個活動幾好玩,各位選手都跑得好開心,好似參加緊嘉年華,又好緊張,因為有架「車」追住你。澳門區今年嘅冠軍係張明亮,跑咗24.7公里,超過半個馬拉松,唔問唔知,佢果日上晝仲參加咗另一場比賽,認真犀利。活動唔似傳統比賽有固定嘅終點,成個過程就係挑戰自己,同時又提醒你,呢個世界上,仲有一班脊椎受傷嘅患者需要關注,一舉兩得。如果你鍾意跑步,又想做善事,下年活動嘅時間係2018年5月6號,記得留意啦。)

活動官網:https://www.wingsforlifeworldrun.com/tw/zh/)

記者/李嘉耀

比賽結束後,選手與工作人員一起收拾水站
其中一名選手展示自己的成績
張明亮(坐地者)奪得本次比賽的冠軍

發表迴響