【人物講嘢】梁嘉豪(獨木舟教練)

天氣回暖,夏日將至,又係參加水上活動嘅季節啦!而獨木舟亦係一項唔錯嘅選擇,可以畀你獨自一人泛舟湖面或海中,全靠一個人一支杆去推動隻艇,岩曬鍾意挑戰嘅人士!今期我哋訪問澳門年輕獨木舟教練Aska,同我哋分享一下獨木舟運動嘅樂趣。

記:Isaac A:梁嘉豪 Aska

記:Aska目前喺獨木舟隊中擔任咩角色?

A:目前我係獨木舟教練,亦係一名運動員,澳門隊嘅成員。而我嘅正職係歷奇導師,服務青年人。

獨木舟技術要求比龍舟更高

記:當初係點樣接觸獨木舟呢項運動?

A:我細個嗰陣有氣管問題,唯有靠游水去改善,所以好早就已經熟習水性。九九年開始跟爸爸去玩獨木舟,有一班師兄帶住一齊玩,好開心,至今已有十八年。大約零五年開始,喺暑期活動擔任獨木舟助教,覺得教人都幾開心,零六年就正式教班,零七年開始成為運動員,參加更專業嘅運動員訓練。

2003年本地獨木舟水球賽(圖片由受訪者提供)

記:目前澳門嘅獨木舟運動發展情況如何?

A:獨木舟係水上運動,澳門有南灣湖同竹灣嘅獨木舟訓練基地,受到場地限制,亦受冬季氣溫影響,人員流動性高,唔算係非常熱門嘅運動。近年南灣湖水上活動中心加入大眾體育系統,一般市民報名後就可以自己租艇玩,所以都多咗人參加。玩獨木舟最重要係做好安全措施。

2010年廣州亞運(圖片由受訪者提供)

記:澳門獨木舟嘅成績如何?

A:世界青年綿標賽、世界錦標賽、全國運動會、亞運等大賽都有參加,試過入到半決賽,有一定嘅水平,可惜目前成績與世界仍有距離。

本地比賽(圖片由受訪者提供)

記:你個人嘅運動員生涯目標為何?

A:運動員通常以三十五歲為限,我今年二十八歲,希望可以參加一八年嘅亞運,作為生涯嘅最後一役。往後會繼續專注擔任教練,培育下一代獨木舟運動員。

本地比賽(圖片由受訪者提供)

記:澳門政府對獨木舟嘅支援是否足夠?

A:政府對我哋嘅支持暫時都好足夠,包括場地、器材,亦都支持我哋出外參賽。但好似精英運動員計劃,時間上我哋嘅成員較難配合,而訓練場地嘅空間亦未及外地,距離不足,對訓練長距離嘅項目較為局限。未來希望獨木舟賽可以成為學界項目。

獨力挑起一隻獨木舟都無難度

記:最後有無說話想同大家分享?

A:獨木舟係水上面,係好實在,同做人一樣,你有動力,隻艇會前進,勇往直前甚至會事半功倍。但你停,隻艇都會停,隨之而來就只會隨波逐流。所以定好目標就要勇往直前!

Aska目標係參與2018年亞運

(訪後餘記:相比起一大班人熱熱鬧鬧嘅龍舟項目,獨木舟係比較講究個人技術,亦可以畀你一個人喺水中央靜落嚟,由自己去掌握前進嘅方向,係一項適合鍾意挑戰自我嘅人嘅運動項目,各位有興趣嘅人士,不妨趁住天氣回暖,去南灣湖一試身手,體驗泛舟嘅樂趣。)

澳門獨木舟會 Clube de Canoa de Macau

https://www.facebook.com/澳門獨木舟會-Clube-de-Canoa-de-Macau-1019837958031633/

「隻艇落到水,有機會隨波逐流,你想佢點樣走,就要靠你自己去畀動力佢,你停佢就停,你畀動力,佢就會向住目標前進。」

發表迴響