【人物講嘢】梁靖偉、何冰儀(劍擊運動員)

相比起足球、籃球,劍擊喺澳門仍然屬於冷門嘅運動,而且澳門劍擊學界賽只有短短六年嘅歷史。但參與其中嘅選手投放落劍擊嘅熱情同精力,絶對唔比其他運動差。近六年來,隨住劍擊學界賽嘅舉辦,新一代嘅人才亦隨之湧現,當中有目前就讀澳大嘅男子花劍選手梁靖偉同學以及旅遊學院嘅女子花劍選手何冰儀同學。今期廣野訪問佢哋點樣喺大學繼續自己嘅劍擊生涯同日後嘅規劃。

記:阿賢 何:何冰儀 梁:梁靖偉

梁靖偉
何冰儀

記:簡介一下兩位係幾時開始接觸劍擊運動?

梁:我喺初三升高一嘅暑假,受一位朋友邀請,參加劍擊嘅暑期活動。其後畀教練叫去打新秀賽,就一直練到而家。

何:我都係暑期活動接觸劍擊,當時我係中二學生。透過劍擊,我識到一班好好玩嘅朋友,亦成為我堅持練習劍擊至今嘅動力。

記:你覺得你喺劍擊上得益於邊方面嘅長處同努力?

梁:我以前亦有練習過柔道,練得好辛苦,但名次上亦只能攞到第三,因此中途轉為劍擊,得益於以前嘅訓練,喺速度、爆發力、力量方面有優勢。

何:我喺速度、步法上比較靈活,距離感亦較好,所以能夠進入到對手嘅距離命中。

何、梁二人平時亦會對練

記:劍擊運動對你哋嚟講有咩吸引之處?

何:型!著住成套劍服、面罩,你就係一個運動員,能唔能夠引起大家關注,完全在於自己喺賽場上嘅表現。而且,劍擊唔可以只靠死練,要用腦筋,同對手鬥智鬥力。我雖然身高唔高,但靠技巧,仍然有方法取長補短。

梁:有句話講,劍擊就係「用體力捉嘅象棋」,刺中一劍,必須要動好多腦筋,做假動作。要體驗劍擊,事前必須要做好多動作,經過咗嗰段時間,就會感受到嗰種樂趣,呢種滿足感係好少運動可以得到嘅。

記:劍擊運動帶畀你哋咩美好回憶?

梁:我初次打校際賽只能入到四強,唔甘心輸咗,反而激發起爭勝心。於是繼續練習,最終得到第一。而且,一班人一齊訓練係好美好嘅回憶。以往暑假我地會鬥早搭半個鐘車程返黎澳門蛋訓練。

記:花劍上男女對練,係咪同樣能夠互相有所得益?

梁:相對於女花而言,同男花對打,更能訓練速度力量,及時拉開距離。而對我而言,女劍擊手身形較為小巧,攻擊命中亦更困難,能夠訓練到我劍尖嘅準確性。

何:而且我慣用左手,佢係右手。佢能夠練到同另一慣用手選手嘅實戰經驗。

記:升上大學後你地會點樣規劃自己訓練同學習時間?

何:相比起中學,其實大學時間上更為自由,有時唔洗上堂,就可以投入更多時間喺訓練上。我訓練時間通常係逢周一、三、五晚上七時到九時,周日下午三時到六時。有時亦會去教下劍,算係一份兼職。

梁:我比較忙,除咗教劍,我有做其他兼職。喺澳大同喺澳門蛋都要練劍,時間算係幾充實。

記:可否講下大學生涯有咩重要賽事,當中得到過咩經驗?

梁:亞洲劍擊錦標賽、亞洲青少年劍擊錦標賽、亞洲U23劍擊賽、亞運等,都係比較重要嘅賽事。最後一次亞青最難忘,當時大二,唔想有遺憾,花咗心機去練,最後總算入到淘汰賽,能夠用上訓練時嘅成果。

何:上一屆嘅仁川亞運女子花劍團體賽中取得第六,算係澳門、個人嘅最好成績,我地呢個三人組合打咗好多年,呢次亞運成績算係對我地女花團體嘅鼓勵。

何冰儀2014年出戰仁川亞運
何冰儀2014年出戰仁川亞運

記:你覺得相比起外地選手,澳門選手有咩特點?

梁:澳門選手通常比其他地區遲接觸劍擊,規範、系統、基本功不足,呢個係不足之處;相對而言,澳門人嘅打法比較新穎,雖然唔及其他人有章法,但往往能夠殺對方一個措手不及,反而能夠有優勢。

2015年赴烏蘭巴托參加U-23比賽
2015年赴烏蘭巴托參加U-23比賽

記:嚟緊將會有咩重要賽事?

梁:本年六月將會有亞洲錦標賽、八月台灣世界大學生運動會。依然係備戰,全力以赴希望取得好成績。

記:你哋畢咗業後有咩打算?

梁:始終即將畢業,我亦要放低劍擊。

何:我畢業後應該會先搵工作做下,跟住再睇情況。但係我一定會打埋2018年亞運。

記:你哋對劍擊運動喺澳門嘅狀況有咩睇法?

梁:我日後得閒會返黎同佢哋打下實戰,培訓下佢哋。舊嘅人離開,希望新嘅一批人能夠接上。但始終有差距,都有有潛質嘅後輩,但通常讀完中學就會離開,會有青黃不接清況。

何:劍擊係一項高消費活動,單單係基本裝備都要兩千到五千元不等,如果要小朋友學,家長亦會擔心佢哋會唔會半途而廢,未必願意一下子使咁多錢。因此學校對於劍擊運動嘅推廣就顯得更重要,劍擊總會亦希望能夠喺中小學開到班。目前嚟講,除咗集訓隊、暑期班,小朋友要接觸劍擊實在唔容易。而且,劍擊學界賽目前只有短短六年歷史,亦未有相應水平,希望日後能夠逐漸提升。

記:你希望目前政府、社會、學校對劍擊運動可以有咩支持?

何:場地係非常重要嘅。劍擊運動目前只有澳門蛋有較為正式嘅場地,對於小朋友嘅培訓係非常唔夠嘅。學校推廣上希望能夠有更多嘅資助。

梁:希望有更多具專業水平嘅教練訓練我哋。我哋目前都係一個教練兼帶花劍、重劍兩個項目。如果能夠揾到更多裁判同教練嚟同我哋交流,對長遠發展有利。

記:有咩想同廣野嘅讀者講?

何:希望大家都能夠喺中學生涯就搵到自己嘅興趣。

梁:堅持就會有成果。澳門人少,肯堅持、爭取,就會有收穫。

(訪後餘記:雖然起步得比各地嘅選手遲,但梁靖偉同何冰儀喺世界賽場上已經踏出難能可貴嘅一步。雖然已經到咗大學劍擊生涯嘅尾聲,亦將要迎來人生新嘅階段,但佢哋仍然努力不懈咁去訓練,希望為自己大學運動生涯爭取好嘅結果,而且亦想為培訓下一代嘅選手貢獻自己一份力量。佢哋嘅種種努力,相信將為日後澳門劍擊嘅發展打下堅實基礎。)

記者/阿賢
攝影/Isaac

「澳門人少,只要你肯堅持、爭取,就會有收穫。」

發表迴響