【人物講嘢】馮淑玲(圍棋教練)

逆流而上、義無反顧去堅持自己嘅志向,試問又有幾多人?澳門圍棋會教練馮淑玲就係一個例子。兩年前,馮淑玲辭去銀行嘅工作,決意擔任圍棋全職教練,將圍棋傳承俾下一代。澳門圍棋會由上世紀九十年代至今,面對科技進步及社會發展嘅洪流,依然堅持不懈,培育出一代一代嘅本地棋手,馮淑玲亦係當中一員,亦係碩果僅存嘅幾位教練之一。舉步維艱嘅當下,馮淑玲要點樣堅守落去?

記:阿賢 馮:馮淑玲

記:能講述一下你喺澳門圍棋會嘅工作嗎?

馮:由大學起我就擔任澳門圍棋會嘅教練,主要係教導中小學生,都教咗十二年,以往係兼職,兩年前轉為全職。目前我嘅棋力係業餘二段,雖然唔係好高,但我好享受教導小朋友圍棋嘅過程。

記:小朋友對圍棋嘅興趣如何?

馮:澳門近年其實有好多小朋友對圍棋有興趣,比起我果一輩仲要多。喺學校辦嘅圍棋課程好多時滿額,要抽籤爭位。而且唔少學生會每年都報名,連續跟我學咗三四年。

記:你覺得圍棋對於小朋友嘅吸引力喺邊?

馮:易學,咁多種棋,最容易學就係圍棋,唔似象棋有咁多規則,或者五子棋有禁手,圍住就可以食子,邊一方圍地最多就贏,十分鐘就可以講完。第一堂教識咗學生,佢哋立即可以玩。

記:作為教練,你覺得教導小朋友圍棋嘅滿足感喺邊?

馮:有位小三嘅學生數學成績好差,自從學咗圍棋,就有好大嘅進步;又有學生透過學圍棋,性格變得溫文而有耐心,個人修養有改善;學圍棋仲可以令坐唔定嘅幼稚園小朋友全神貫注喺棋局上,樂在其中。能夠見到教過嘅學生有呢種改變同樂趣,係好開心嘅事。

兩年前,馮淑玲辭去銀行工作,決意擔任全職圍棋教練
兩年前,馮淑玲辭去銀行工作,決意擔任全職圍棋教練

記:係咩令你決心轉為全職教練?

馮:之前我喺銀行做,藉著結婚生子嘅契機,亦算係俾個理由自己豁出去一試,於是辭咗銀行份工,全職教圍棋。

記:圍棋會目前嘅發展狀況如何?

馮:可以話係青黃不接,總係一批人喺求學時期嚟學棋,到咗升學或者就業後,就不得不中斷圍棋嘅興趣,之後又一批新嘅人過嚟。每逢周六夜晚八點亦有數位資深棋手過嚟捉棋。有一啲熱心嘅朋友有需要時會過嚟幫手,但如果係長期喺會內工作,就只有我同張慶章先生係全職教練。

目前我哋會有幾位教練,喺多間學校開設有圍棋課程,課餘活動或正課性質都有,亦有大眾班、暑期班等。

馮淑玲表示,圍棋係咁多種棋之中最易學,因為規則簡單
馮淑玲表示,圍棋係咁多種棋之中最易學,因為規則簡單

記:你係幾時開始接觸圍棋?

馮:初時我係跟爸爸學中國象棋,於是象棋成為我小學時期嘅愛好。初中時老師同我講「有棋學」,我又一窩蜂走咗去學,點知嚟咗澳門圍棋會,當時我連咩係圍棋都唔知。學咗三年,但自己嘅棋力進步好慢,同輩人都已經勝過我。跟住我就開始細心睇人哋捉棋。我又連續三年參加汕頭暑期培訓營,每年一去半個月,早晚都訓練圍棋,同老師同學互相切磋。棋力先得以提升。我喺澳門最好嘅對賽成績係全澳女子圍棋賽嘅第二名,當時我高三。

2017年,馮淑玲(左三)赴韓國比賽,與世界冠軍李昌鎬(右三)合照
2007年,馮淑玲(左三)赴韓國比賽,與世界冠軍李昌鎬(右三)合照

記:對於個人棋力上有冇更高嘅追求?

馮:有,希望今年內可以上業餘五段。

記:你覺得目前本地圍棋喺推廣上嘅狀況如何?

馮:教圍棋嘅人實在太少。我以往除咗喺圍棋會教,亦有負責教外面嘅大眾班。但因為目前政策方針嘅改變,資源有所縮減,對我哋開班數量有影響。

澳門嘅特點係資源好多,好多學生可以輕易搵到平價甚至免費嘅課程,上堂亦多數係抱住玩嘅心態,太高深、進階嘅課程反而難以引起佢哋興趣;對於水準足以理解高難度課程嘅人而言,佢哋又會因為升學就業問題,而無法再集中精力喺圍棋上。再者,而家嘅娛樂多姿多彩,唔同以前,逢星期六日,一大班人就會自動自覺嚟圍棋會捉棋,好開心,如果唔係喺到識到一班棋友,我可能唔會繼續學圍棋,而家要聚人喺個會度唔容易。

馮淑玲接手圍棋會後,積極向外推廣,為協會設計了吉祥物
馮淑玲接手圍棋會後,積極向外推廣,為協會設計了吉祥物

記:目前人工智能圍棋手Alpha Go、Master已經擁有超越人類嘅棋力,你覺得對於圍棋而言意味住咩嘢?

馮:其實係一件好事,人工智能可以視為指導人類嘅老師。因為本身圍棋就有好精彩嘅世界,即使人工智能打敗咗人類,捉圍棋嘅依然大有人在。等於我哋同老師捉棋一樣,棋力當然不及,但我哋需要嘅係進步,大家都希望探討圍棋嘅各種奇妙同樂趣。以後嘅人工智能可能會設計成唔同嘅級別,可以作為測試對戰者棋力嘅準則,使將來圍棋嘅教學更為標準化、更為完善。

位於士多紐拜斯大馬路的澳門圍棋會
位於士多紐拜斯大馬路的澳門圍棋會

記:對於圍棋喺本地嘅日後發展,你有咩建議?

馮:我哋希望社會上對圍棋有了解嘅人士,可以俾身邊嘅人多了解呢項運動。亦希望圍棋可以進入更多嘅學校。目前圍棋師資嚴重不足,好老實講,教圍棋嘅月入並唔高,如果在位者或有心人能夠投放更多資源喺師資上,咁幾年內就可以見到一定成效同規模,能夠培育出新一批學生同會員。

記:你有咩想同廣嘢嘅讀者講?

馮:做每一件事都要堅持,總有成功嘅一日。

(訪後餘記:馮淑玲自從大學以嚟,就一直孜孜不倦去向中小學生傳承圍棋,而傳承嘅,唔只係技藝,更係一種文化,一種修養,一種信念。馮淑玲雖然圍棋生涯中多有困阻,棋力進步緩慢、同道逐漸疏少、資源嚴重不足,但如此種種,反而更增添佢口中「堅持」兩字嘅份量,以及佢對圍棋嘅熱心同精誠。)

記者/阿賢

攝影/Isaac

「做每一件事都要堅持,總有成功嘅一日。」
「做每一件事都要堅持,總有成功嘅一日。」

澳門圍棋會

https://www.facebook.com/weiqimo

07-全澳圍棋班

08-2017年賽事一覽

發表迴響