【人物講嘢】A-Mo、Dennis Tou(小勝軒拉麵)

澳門近年多咗唔少拉麵店,連日本著名嘅拉麵店品牌都落戶澳門,將正宗日式拉麵帶嚟澳門。與此同時,亦有澳門人將拉麵技藝進行革新,創作更多具有獨特風味嘅拉麵品牌。當中,由Dennis同A-Mo創立嘅小勝軒,除咗有經典豬骨濃湯,更定期推出創新口味,已漸漸喺本地打響名堂。

記:Isaac

Mo:伍時威 A Mo(小勝軒大廚) D:Dennis Tou(小勝軒東主)

伍時威-A-Mo(大廚)
伍時威-A-Mo(大廚)
Dennis-Tou(東主)
Dennis-Tou(東主)

記:兩位請介紹一下自己喺拉麵店嘅工作?點解會創立小勝軒?

D:我係一位餐飲業者,經營中餐、西餐、日本料理等,而小勝軒係我嘅第一間餐廳。事緣有次去日本,食過日本嘅拉麵,自此就愛上。後來澳門多咗人食拉麵,於是就計劃進軍拉麵市場,就再去日本搵合作伙伴,終於搵到一間供應商提供湯底,但當時澳門租金貴,唔係咁容易開店。於是等咗一年,經朋友介紹氹仔老虎巷呢間舖位,雖然偏僻咗啲,但環境都唔錯。

Mo:我喺香港從事咗十幾年日本料理,各種日式料理都學過。自小就認識Dennis,佢就搵埋我一齊創立小勝軒,我想挑戰自己,由零開始,一手一腳創立一間拉麵店 ,自己亦想喺拉麵領域上有所創新,而家係小勝軒嘅大廚。

伍師傅有十多年從事日本料理經驗
伍師傅有十多年從事日本料理經驗

記:介紹一下小勝軒嘅品牌理念?

D:小勝軒係我哋自創嘅品牌,將新舊元素相互融合,由一位理工學院學生負責設計,利用一啲日式動漫元素,我哋都畀好大自由度設計師。每個麵嘅理念由師傅創作及制定,再交畀設計師去創作。人人都鍾意大勝,但其實我哋小勝都可以好滿足,呢個名亦都提醒自己要有謙卑之心。

05

記:你哋嘅招牌拉麵「勝軒」有咩特別?

D:我哋嘅湯底配方係取自日本,有原味「勝軒」同辣味「赤軒」,經過半年時間改良,為咗符合澳門人嘅口味再進行調配,減少豬油成分,因為澳門人鍾意清一啲。而「特濃勝軒」嘅湯底要熬八個鐘。麵條亦係用特有配方,幾經辛苦先搵到一間澳門麵廠為我哋特製。我哋嘅叉燒開始跟足日本方式去煮,後來融合咗法式嘅慢煮技術,要用八個鐘去煮,口感更特別。

特濃勝軒
特濃勝軒
海老軒
海老軒

記:有別於一般嘅拉麵店,小勝軒經常推出新款拉麵,你哋係點樣進行創作?

Mo:主要係由我同Dennis討論,通常會選用當季時令食材,我哋會希望做有層次嘅味道,令客人有驚喜。好似「綪軒」,係以兩種唔同嘅蕃茄做湯底,上加芝士,令鮮味有層次,超出一般想像。拉麵創新已經唔容易,我哋希望可以不斷突破,過到自己仲要過到人哋。

D:日本嘅拉麵店通常只做一兩款,因為佢哋大部分係家庭式經營,人手不足,無法負擔太多款式。喺澳門就要符合返市場需求,適當加入創新元素,不過我哋就算研發新口味,都係每日限定30碗,有時都有客人抱怨食唔到。

火山軒海報
火山軒海報
海老軒海報
海老軒海報

記:你哋認為澳門餐飲業經營情況如何?

D:地產市道太強勢,我哋大部分嘅營業開支都畀咗租金咁滯,加上請人難,人手不足,唯有自己落場做埋一份。同埋政府審批牌照程序太慢,租舖、裝修直至等到發出牌照、審批勞工到正式開業,中間都要支付唔少租金,希望可以參考鄰近地區,發出臨時牌照,以便我哋盡早開業。

動漫風格人物
動漫風格人物

記:你哋認為澳門拉麵嘅文化風氣如何?

Mo:我哋都試過其他嘅拉麵店,好多都好有特色,係良性競爭,大家都會進步,令顧客有所選擇,擴大拉麵普及程度。顧客嘅品味都有進步,多咗人接受新事物,對飲食有要求,所以廚師都要隨住社會不斷提升廚藝。

記:小勝軒有咩發展計劃?

D:我哋會繼續堅持自己,不斷創新。未來計劃以加盟形式擴張,期望將澳門拉麵品牌帶到其他地方。

記:最後有咩說話想同大家分享?

Mo:做人,唔好畀藉口自己!

D:成功,要畀任何人付出更多時間,盡力去做,enjoy過程!

(訪後餘記:小記都好鍾意食拉麵,亦親身試過唔同拉麵店,有日本嚟嘅又有本地嘅,但喺澳門嚟講,小勝軒始終係我嘅心水,保持水準之餘間中又有新款式,顧客經常有新鮮感,令人感受到佢哋拉麵嘅「真心入魂」。)

記者/Isaac

位於氹仔老虎巷的小勝軒本店
位於氹仔老虎巷的小勝軒本店

小勝軒

Facebook:https://www.facebook.com/414869142000520/

氹仔店:氹仔老虎巷1-33號,歡樂花園地下I座

營業時間:中午12:00 – 晚上09:00

電話 : 6648 5443

南灣店:澳門商業大馬路南灣壹號1樓B(財富中心對面)

營業時間:中午12:00 – 晚上09:00

電話查詢:6204 6106

發表迴響