【人物講嘢】林婉晴 Kate(乾花手作人)

好友親朋過節,心思思唔知送咩禮物好?乾花製作嘅飾物係唔錯嘅選擇,既美觀又實用,加上乾花能夠長久保存,亦有情誼永固嘅象徵。本地乾花製作人林婉晴(Kate),本身係職場女性嘅佢,善用工餘時間自學乾花手藝,短短兩年已經製作咗唔少作品。今期人物講嘢就聽下佢係點樣開拓自己嘅興趣。

記:阿賢 Kate:林婉晴

記:請介紹一下乾花製作呢門手藝?

Kate:乾花製作主要有兩種:一種叫壓花,另一種叫乾花。壓花就係用重物壓花,吸乾裡面嘅水份,成品會變得薄身,呈現平面,顏色亦會有少少變化;乾花就係將新鮮嘅花材倒吊,自然風乾,比起壓花更為立體,亦有鮮花嘅觀感。乾花可以用於裝飾各類物件,如手提電話殼,亦可以用作天然精油大豆蠟蠋嘅花紋,既美觀又有香薰嘅功效。

氹仔創意店售賣的Naomi產品
氹仔創意店售賣的Naomi產品

記:喺咩機緣之下接觸到呢門手藝?

Kate:大概兩年前左右,我喺網絡上見到有唔少日韓乾花製作人分享嘅相片,覺得都幾新奇有趣,而喺澳門又好似揾唔到地方去學呢樣嘢,於是上網揾教學,買書研究。可謂係由零開始,一步步摸索返嚟,都要大半年時間先掌握到呢門手藝。

乾花手機殼
乾花手機殼

記:你覺得製作乾花嘅樂趣喺邊到?

Kate:因為女仔都會鍾意花,同埋平時收到啲花,可能擺幾日啲花就謝咗,覺得好可惜,乾花製作可以將花保存得耐啲,等佢唔會咁快凋謝,算係延續佢地嘅生命,亦可以隨身攜帶,送俾朋友,借花寄意。

記:乾花製作嘅材料喺邊到可以揾到?

Kate:其實本地都有材料店可以買到,我有時亦會去花市買一啲鮮花去壓,亦會上網訂購一啲染咗色嘅花材。

乾花手機殼
乾花手機殼

記:你都係喺自己屋企製作乾花?製作大概要幾耐?

Kate:如果要風乾鮮花,通常要睇返天氣狀況,秋天較乾爽嘅話要三四日左右,耐嘅話要一星期,壓花亦大概要三到四日。

記:整乾花需要咩技巧?

Kate:要好細心,乾花好脆弱,可能一下唔小心郁一郁就會裂咗。

乾花音樂盒,不同款式有不同樂曲
乾花音樂盒,不同款式有不同樂曲

記:你係點樣開始經營乾花品牌Naomi?

Kate:初時整乾花都係送畀朋友,朋友都覺得幾靚,建議我開網店。間中亦會參加寄賣、藝墟等手作市集,推廣下自己品牌。寄賣點之一就喺氹仔創意店,可以俾遊客知道一下本地嘅手作,亦可以買嚟做手信。慢調書旅亦有我地嘅產品。而喺今年開始,我地會開更多教授乾花製作嘅課程。

乾花音樂盒,不同款式有不同樂曲
乾花音樂盒,不同款式有不同樂曲

記:可否介紹一下你目前比較有特色嘅作品?

Kate:我地嘅產品都係純手工天然製作,而家比較熱賣嘅就係乾花音樂盒,可以透過唔同嘅花款同音樂寄意,送俾朋友做生日禮物。手機殼亦比較多人鍾意。因為每種乾花裝飾都係獨一無二,唔會同市面上嘅撞款。

記:之後有咩新產品推出?

Kate:我最近對香薰同蠟燭都比較有興趣,自己睇書研究緊。因為乾花本身係冇香味,我想由此增色一下。

參與塔石藝墟
參與塔石藝墟

記:乾花製作喺邊類發售平台比較受落?

Kate:網上平台方面,喺instagram會比較受歡迎;如果係實體店,藝墟反應會比較好,因為近一兩年藝墟都辦得唔錯,會邀請外地人嚟,檔攤種類比以前更多,集中咗各種手作同原創品牌,有氛圍,吸引到感興趣嘅人去睇,購買欲較高,我亦可以親身向客人講解創作嘅理念同過程。

乾花精品以另一種方式延續了花的生命
乾花精品以另一種方式延續了花的生命

記:有咩想同廣野嘅讀者講?

Kate:如果鍾意一樣嘢,不妨大膽啲行出一步去試下,唔試又點知結果?

(訪後餘記:正如Kate所講,「由零開始」到逐步發展至開班教學,當中投入咗唔少努力同心血,但亦換嚟無窮嘅樂趣同寶貴嘅經驗。喺當今無遠弗屆嘅互聯網,只要肯集中精力去做一件事、鑽研一項技能,每個人都可以發展出正職以外嘅「第二人生」!)

記者/阿賢

攝影/Isaac

Naomi

https://fb.com/Naomimacao

氹仔創意店

https://fb.com/DangChaiDesignShop

「如果鍾意一樣嘢,不妨大膽啲行出一步去試下,唔試又點知結果?」
「如果鍾意一樣嘢,不妨大膽啲行出一步去試下,唔試又點知結果?」

發表迴響