【人物講嘢】澳門競技啦啦隊協會

對於本地嘅朋友來講,競技啦啦隊仍然係一項比較新穎、陌生嘅運動。但係喺台灣、日本,乃至泰國、美國等,早已發展蓬勃、深入民心。即使喺香港,亦已開始受到重視。而喺澳門,一班喺台灣留學歸來嘅年青人,懷抱住大學四年來參與啦啦隊嘅汗水、感動同熱情,再次喺呢度聚集起來,由核心成員Dora、Genet、Oscar、Lok、Leo、Chloe、Ada組成嘅MACC澳門競技啦啦隊協會,喺有限嘅資源同時間下,仍然不懈訓練,決意要將呢項運動引入澳門,將星星之火,燃點為燎原的光輝。

(封面圖:澳門競技啦啦隊協會主要成員,左起:Lok、Chloe、Ada、Leo)

記:阿賢
受訪者:Lok、Leo、Chloe、Ada


記:可否介紹一下你地協會?
Lok:我地係以競技啦啦隊為主嘅一個運動社團。澳門有啦啦隊嘅協會,但佢哋係以舞蹈為主,未有競技性嘅元素喺裡面。所謂競技元素,包括跳躍、翻滾、口號、舞蹈、疊羅漢等技巧。所以暫時嚟講我地係澳門唯一一隊競技啦啦隊。

澳門競技啦啦隊協會一眾成員
澳門競技啦啦隊協會一眾成員

記:你地係點樣成立啦啦隊嘅呢?
Lok:我之前喺台灣讀書,競技啦啦隊運動喺台灣較流行。五年前我喺網上留言,問澳門有冇人玩開呢類運動,當時係冇任何回音。直至今年七月,一位來自台灣嘅空姐Dora,佢見到留言,喺facebook聯繫我。同時我又聚集咗幾位同道中人,包括Leo、Chole等,大部分都係喺台灣讀書時都玩過,我地初時相約喺氹仔運動場一齊練習,於是就成立咗啦啦隊。

競技元素包括跳躍、翻滾、口號、舞蹈、疊羅漢等技巧
競技元素包括跳躍、翻滾、口號、舞蹈、疊羅漢等技巧

記:可否介紹一下競技啦啦隊喺台灣有幾盛行?
Lok:作為一項體育運動,競技啦啦隊喺台灣有各種級別嘅學界賽事、亦有全國賽,國際上更有世錦賽,不論在學還是在職都可參賽。競技啦啦隊因為有表演性質,在職人士亦可組成社會隊,出外接活動表演,因此喺台灣可謂係一項全民運動。最近競技啦啦隊更獲得國際奧委會認可,有望成為下屆東京奧運嘅體育項目。

隊員分為底層和上層
隊員分為底層和上層

記:啦啦隊成立以來發展如何?
Lok:我哋自從一六年七月成立以來,到九月至十月已經有十幾名隊員,可以組成註冊協會。
Ada:然後我哋亦開始接一啲婚禮表演,觀眾反應都好好,覺得新穎。首次演出後,就收到好多機構、學校嘅演出及培訓邀請。

啦啦隊講求合作、信任和活力
啦啦隊講求合作、信任和活力

記:你哋隊員各自有分工嗎?
Ada:阿Lok比較全能,疊羅漢底層、支撐隊員、翻騰跳躍等都可以勝任。我負責上層,較有畫面性嘅動作,如金雞獨立等。Leo有教練牌,負責排練技巧、訓練流程。Chole就安排口號等。

記:玩呢項運動有咩要求?目前你哋隊伍水平去到邊到?
Ada:競技啦啦隊講求團隊合作精神、要充滿活力。我地隊伍夾咗差唔多半年,目前金字塔、單底等動作都可以掌握到。

Leo在台求學時參加大專盃比賽
Leo在台求學時參加大專盃比賽

記:呢項運動都有唔少高難度動作,會唔會比較危險?
Leo:我哋係特別注意安全,每位新隊員入嚟,我地都會首先教佢地一句:沒有安全,就沒有啦啦隊!

記:新隊員由零開始,你哋會點樣開始訓練佢哋?
Leo:如上所講,我地首先會教導佢哋安全意識,進行肌力訓練,使佢哋有支撐隊員嘅力量,由底層、簡單動作做起,再慢慢提升上去。每個星期我哋會有兩晚嘅訓練,由八點鐘到十二點。

每年台灣的清華和交通兩所大學會舉行梅竹競賽
每年台灣的清華和交通兩所大學會舉行梅竹競賽

記:對你哋而言,啦啦隊訓練有咩樂趣?
Ada:刺激,有挑戰性,可以感受到隊員間嘅信任。因為作為一名Flyer(上層表演花式的隊員),如果唔信任底層,就咩都做唔到。因此就算唔係練習時間,我哋都會一齊約出去飲下嘢。
Lok:對我而言,相比起其他運動要同對手較勁,啦啦隊本身係幫人打氣,比賽期間,隊伍間亦會互相鼓勵,完成動作充滿成就感,同隊員間嘅緊密聯繫,使我哋好窩心,可以一齊成長。
Chole:啦啦隊元素較多,無咁悶同單一。同好多伙伴一齊完成高難度動作,成就感係以倍數相乘,係好開心嘅事。
Leo:以前參加台灣嘅大專盃,見到對手有些微嘅失誤,但係通過修正而成功時,亦會真心為佢哋打氣,從心底覺得感動,會眼泛淚光添。我玩過唔少運動,唯獨啦啦隊係最開心,大家庭嘅感覺。

台灣的競技啦啦隊比賽場面熱鬧
台灣的競技啦啦隊比賽場面熱鬧

記:目前澳門仲未流行呢項運動,你地要搵場地係咪比較難?
Ada:澳門無競技啦啦隊嘅專門練習場地,我哋呢項運動嘅場所需要有4米以上高嘅樓底,我哋試過喺氹仔運動場嘅戶外天地、或者屋邨練習,都俾人趕,話動作太危險,驚我哋教壞細路!問過學校嘅體操場地,因為佢哋都有自己嘅學生要用,亦借唔到場。我哋申請體發局嘅場地,佢哋會話場地無規定可以用來練啦啦隊,而拒絶我哋申請。到咗最後,先搵到文化中心嘅戶外廣場做練習,但喺呢到會受到天氣因素影響,太凍或者落雨都唔得,而且練唔到任何空翻。為此,我哋上個月都去咗香港嘅培訓設施,練習各種空翻動作。

隊員之間相互信任,感情要好
隊員之間相互信任,感情要好

記:你哋之後會有咩活動或計劃?
Ada:十二月十七日喺祐漢公園會有表演,之後可能會喺一啲學校嘅畢業典禮演出。
Lok:我地希望能 夠喺澳門推廣呢項運動,因為目前好多人對競技啦啦隊有誤解,但呢項運動講求嘅並非係單純追求高難度,而係一齊合作克服困難嘅精神。

記:對於喺本地發展競技啦啦隊,你哋有咩建議?
Ada:其實澳門體發局嘅一啲場地,例如籃球場,已經好適合我哋使用,只係佢哋將場地定性為某一用途。其實設備上、規則上適當微調一下,對我哋已經有好大嘅幫助。

記:你哋有咩想同廣野嘅讀者講?
眾人:Yes! We are MACC Cheerleaders! 歡迎大家加入!

(訪後餘記:五年前喺網上一個問題,一句回音,居然能夠引發起一班年輕人嘅無比熱情。由零開始,坐言起行,總會搵到同道知音。)

澳門競技啦啦隊協會

https:/fb.com/CHEERLEADINGMACC/


記者/阿賢
攝影/Isaac

「Yes-We-are-MACC-Cheerleaders-歡迎大家加入!」
「Yes! We are MACC Cheerleaders歡迎大家加入!」

發表迴響